विराटनगर । ६८ औँ प्रहरी दिवसको अवसर पारेर कोशी प्रदेश प्रहरी कार्यालय विराटनगरले विभिन्न कार्यक्रम आयोजना गरेको छ । प्रहरीले शुक्रबार विभिन्न कार्यक्रम गरी दिवस मनाएको हो ।

आज विहान बिराटनगरको महेन्द्र चोकमा रक्तदान कार्यक्रम गरेको छ । रक्तदान कार्यक्रममा नेपाल प्रहरीका ५९ जना, नेपाली सेनाका ४ जना, शशस्त्र प्रहरी बल नेपालका १३ जना र ३० जना सर्वसाधारण गरी कुल १०६ जनाले रक्तदान गरेका थिए ।

साथै सोही स्थानमा प्रमुख अतिथिबाट बैण्ड डिस्प्लेको शुभारम्भ भई कोशी प्रदेश प्रहरी कार्यालयको बैण्ड टोलीले राष्ट्रिय भावहरु झल्किने धुनहरु बजाएर बैण्ड प्रदर्शनी समेत गरेको थियो । उक्त कार्यक्रममा कोशी प्रदेश प्रहरी कार्यालय बिराटनगरका प्रमुख प्रहरी नायव महानिरीक्षक राजेशनाथ बास्तोला, नेपाल प्रहरी श्रीमती संघ कोशी प्रदेशकी अध्यक्ष अजिता देबकोटा बास्तोला, कोशी प्रदेश प्रहरी कार्यालय बिराटनगरका प्रहरी बरिष्ठ उपरीक्षक जयराज सापकोटा, प्रहरी उपरीक्षकहरु लगायत अन्य प्रहरी कर्मचारीहरु, सशस्त्र प्रहरी, नेपाली सेनाका कर्मचारीहरुको उपस्थिती रहेको थियो । साथै ६८ औ प्रहरी दिवश २०८० को अवसरमा कोशी प्रदेश अन्तरगत रहेका प्रहरी कार्यालयहरुले समेत आ(आफ्नो जिल्लामा रक्तदान कार्यक्रम संचालन गरे ।
यसैगरी बिभिन्न खेलकुदको कार्यक्रम सम्पन्न भएको छ । असोज २५ गतेबाट संचालन भएको आन्तरिक खेलकुद कार्यक्रममा ब्याडमिन्टन, लामो दौड, टेवल टेनिस लगायतका बिभिन्न खेलहरु खेलाईएको थियो भने खेलमा बिजय हुने खेलाडीहरुलाई प्रहरी दिवसको दिन पुरस्कृत गरिने छ ।

यस्तै आज साँझ सचेतनामुलक बृतचित्र प्रदर्शनी गरेको छ । बृतचित्र प्रदर्शनीमा नेपाल प्रहरी प्रधान कार्यालय तथा कोशी प्रदेश प्रहरी कार्यालयबाट तयार गरेको साईवर क्राईम, लागुऔषध, सामाजिक संजालको प्रयोग लगायतका बिषयहरु समेटिएको भिडियोहरु प्रदर्शनी गरिएको थियो । वृतचित्र प्रदर्शनीमा करिव १५० जना सर्वसाधारणको उपस्थिति रहेको थियो । साथै ६८ औं प्रहरी दिवसको अवसरमा कोशी प्रदेश अन्तरगत रहेका जिल्ला प्रहरी कार्यालयहरुले समेत आज साँझ सचेतनामुलक बृतचित्र प्रदर्शन गरेका थिए ।