तत्काल संसद् बैठक बोलाउन कांग्रेसको माग - News Birat

तत्काल संसद् बैठक बोलाउन कांग्रेसको माग

न्यूज विराट

प्रमुख प्रतिपक्षी दल नेपाली कांग्रेसले संघीय संसद्को अधिवेशन अविलम्ब बोलाउन माग गरेको छ । कांग्रेस पदाधिकारी र पूर्वपदाधिकारीको आज बसेको बैठकले संवैधानिक परिषद्को काम, कर्तव्य र अधिकारसम्बन्धी ३० मंसिरमा जारी अध्यादेश संविधानको मर्म र भावनाविपरीत रहेको ठहरसमेत गरेको छ ।

सभापति शेरबहादुर देउवाको निवासमा बसेको बैठकले ‘संसद् अधिवेशन छलेर संविधानको मर्मविपरीत अध्यादेश जारी गरेर सरकारले अलोकतान्त्रिक चरित्र उजागर गरेको’ आरोप लगाएको छ ।

‘संवैधानिक परिषद्को गरिमा समाप्त पारेर जारी अध्यादेशपछि कुनै पनि निर्णय भएको या गरिने दुवै स्थिति’ कांग्रेसलाई मान्य नहुने जनाउँदै बैठकले अध्यादेश तत्काल फिर्ता गर्न माग गरेको कांग्रेस मुख्यसचिव कृष्णप्रसाद पौडेलले जानकारी दिए ।

बैठकले संवैधानिक परिषद्सम्बन्धी जारी अध्यादेश एवं अन्य समसामयिक राजनीतिक विषयमा छलफल गर्न कांग्रेस संसदीय दल कार्यसमिति बैठक यही ३ पुसमा बोलाउने निर्णय गरेको छ । गत २९ मंसिरको देशव्यापी प्रदर्शनले तनहुँमा पार्टीका वरिष्ठ नेता रामचन्द्र पौडेलमाथि गरिएको व्यवहार, कोभिड–१९ विरुद्ध सरकारको कामकारवाहीविरुद्ध व्यापक जनअभिमत प्रकट गरेको निष्कर्षसहित बैठकले सहभागी सबैमा बधाई ज्ञापन गरेको उनले बताए ।

बैठकले उखु किसानको माग सुनुवाइ गरेर उखुको बक्यौता अविलम्ब चुक्ता गर्न, गराउन आवश्यक पहल र समन्वयका लागि सरकारसँग माग गरेको  छ ।

मा प्रकाशित

यसमा तपाईको मत:

© Copyright 2017 - 2021 Newsbirat pvt ltd. All Rights Reserved.

Design / Developed by codebundles