काठमाडौंको पेप्सीकोलास्थित सनसिटी अपार्टमेन्टमा आरडीटी विधिबाट कोरोना भाइरस (कोभिड-१९) परीक्षण गर्दा २ सय ९८ जनाको नेगेटिभ आएको छ ।

सनसिटी अपार्टमेन्टको ब्लक ‘ए’ मा बस्दै आएका २ जनामा मंगलबार कोभिड–१९ संक्रमण पुष्टि भएपछि उक्त अपार्टमेन्टमा रहेकाहरूको परीक्षण थालिएको हो । ब्लक ‘ए’ मा बस्दै आएका एकै परिवारका ३ जनामा आरडीटीबाट गरिएको परीक्षणमा कोरोना पोजेटिभ देखिएको थियो भने पीसीआर विधिबाट गरिएको परीक्षणमा २ जनाको कोरोना पुष्टि भइसकेको छ ।

बुधबार ब्लक ‘ए’ मा रहेका ९० परिवारका २ सय ४३ जनाको परीक्षण थालिएको थियो । उनीहरू सबैको नतिजा नेगेटिभ आएको कागेश्वरी मनोहरा नगरपालिकाले जानकारी दिएको छ । नगरपालिकाका प्रमुख कृष्णहरि थापाका अनुसार अर्पाटमेण्टमा बस्ने २ सय ९८ जनाको आज परीक्षण गरिएको र सबैको नतिजा नेगेटिभ आएको बताए । संक्रमितका कामदारको पनि नतिजा नेगेटिभ देखिएपछि उनीहरूको स्वाब परीक्षण गर्न लागिएको उनले बताए ।

‘२ सय ९८ जनाको परीक्षण गरिएकोमा सबैको नेगेटिभ आएको छ । उहाँहरूका २ जना कामदारको पनि रिपोर्ट नेगेटिभ आएपछि स्वाब विधिबाट पुनः परीक्षण गरिँदै छ’ उनले भने ‘आधिकारिक रूपमा स्वास्थ्य मन्त्रालयले ४ बजे घोषणा गर्ने भएको छ ।’