विराटनगर । मोरङको कानेपोखरी गाउँपालिका भित्र रहेको सामुदायिक विद्यालय प्रविधिमैत्री हुन थालेका छन् । पछिल्ला प्रविधिको उपयोग गर्दै विद्यालय शिक्षण सिकाइलाई उपलब्धिमूलक बनाउन भन्दै प्रविधिको प्रयोग हुन थालेको हो ।

कानेपोखरी गाउँपालिका ६ मुलगाउँमा रहेको सरस्वती आधरभूत विद्यालयले डिजिटल हाजिरीको सुरुवात गरेको छ । यसै महीनाबाट आरम्भ गरिएको डिजिटल हाजिरीबाट शिक्षक कर्मचारीलाई विद्यालयमा नियमित उपस्थितिका लागि सहयोग पुग्ने विद्यालय व्यवस्थापन समितिका अध्यक्ष खगेन्द्र बराइलीले बताए । ‘शिक्षक समयमै उपस्थित हुने, पूरा समय अध्यापन गर्ने कार्य गरे शैक्षिक सुधारका धेरै सूचक पूरा हुन्छन,’ उनले भने, ‘शिक्षकको दैनिक उपस्थितिलाई नियमित गर्न डिजिटल हाजिरी तथा कक्षा अनुगमनका लागि सिसी क्यामेराको व्यवस्था गरेका छौं । शिक्षक नियमित हुनेबित्तिकै विद्यालयको पठनपाठनमा धेरै सुधार हुन्छ ।’

विद्यालयले मल्टिमिडियाको प्रयोगबाट उपल्ला कक्षा पढाउने कार्यको थालनी गरेको छ । ‘हाल कम्प्युटर, प्रोजेक्टरमार्फत कक्षा मल्टिमिडिया प्रयोग गरेर पढाउन सुरु गरेका छा्रैं,’ उनले भने । यस आधरभूत विद्यालयलाई गाउँपालिका भित्रको नमूना विद्यालयको रुपमा विकास गर्न पुर्व विद्यार्थीहरु लागी परेका छन् । कक्षा पाँच सम्म अध्ययन हुने विद्यालयमा अंग्रेजी माध्यमबाट पठनपाठन सुरू गरेको छ । अहिले आएर प्रविधिको प्रयोग गरेर शिक्षण सिकाइ गुणस्तरीय बनाउने उद्देश्यले पुर्व विद्यार्थीहरुले सिसि क्यामेरा जडानमा आर्थिक सहयोग पनि गरेका छन् । ११ जना पूर्व विद्यार्थीहरुले प्रविधिमैत्री विद्यालय बनाउनको लागि ९६ हजार रुपैयाँ आर्थिक सहयोग गरेका छन् ।

विद्यालय परिसरमा आइतबार सिसि क्यामेरा, डिजिटर हाजिरि, प्रोजेक्टरको उद्घाटन गरी संचालनमा ल्याएको छ । सिसी क्यामेरा जडान गरेर दैनिक कक्षा अनुगमन गरेको विद्यालयले जनाएको छ ।

गाउँपालिका भित्र अन्य सामुदायिक विद्यालयले पनि प्रविधिलाई जोड दिन थालेका छन् ।