विराटनगर । इलाका प्रहरी कार्यालय रानीका इन्सपेक्टर सन्दीप वेल्वासेले भारतसँगको खुला सीमाका कारण लागूऔषध नियन्त्रण चुनौतीपूर्ण बनिरहेको अवस्थामा यसको रोकथाम र नियन्त्रणमा लागि पर्ने बताएका छन् ।

शुक्रबार पत्रकारसँगको परिचयात्मक कार्यक्रममा उनले भयावह अवस्थामा रहेको लागूऔषध नियन्त्रणका लागि प्रहरी सक्रियता बढाइएको जानकारी दिए ।

‘सबै पक्षसँग समन्वय गर्दै लागूऔषधलगायतका अपराध नियन्त्रणका लागि प्रहरी निर्मम रूपमा प्रस्तुत हुन्छ,’ इन्सपेक्टर वेल्वासले भने, ‘अपराधरहित समाज निर्माणमा सबै सरोकारवालाको सहयोग प्रहरीलाई आवश्यक छ ।’ लागूऔषध रोक थाम र नियन्त्रणको लागि अभियान सुरु गर्ने उनले बताए । सबैको साथसहयोगले मात्र शान्ति सुरक्षा कायम गरेर अपरोध रोकथाम र नियन्त्रण गर्न सकिने उनले बताए । ‘त्यसैले समाजमा सबैको साथ सहयोगको खाचो रहेको छ,’ उनले भने ।

भारतसँग सीमा जोडिएको इप्रका रानीमा आर्थिक वर्ष २०७९÷०८० मा विभिन्न अपराधसँग सम्बन्धित ३ सय २२ वटा मुद्दा दर्ता भएको अभिलेखमा देखिन्छ । एक वर्षमा ३२२ वटा मुद्दा दर्ता भएको मध्ये लागूऔषधसँग सम्बन्धित मात्रै २ सय ७ वटा छन् । जुन प्रतिशतको हिसाबले ६४.२८ प्रतिशत हुन आउँछ । प्रहरी हिरासत सधैँजसो लागूऔषध सम्बन्धी मुद्दाका थुनुवाले नै भरिने गरेको छ ।
रानीबाट आर्थिक वर्ष २०७८÷०७९ मा लागूऔषधसँग सम्बन्धित १ सय ९३ वटा मुद्दा दर्ता भएको थियो । २०७७÷०७८ मा १ सय १ वटा मुद्दा दर्ता भएका थिए । सीमा क्षेत्रमा लागूऔषधको तुलनामा अन्य अपराधसँग सम्बन्धित मुद्दा कम छन् ।

विराटनगरको रानीमा मात्रै हैन, लागूऔषधसँग सम्बन्धित मुद्दा कोशी प्रदेशमै धेरै छ । विशेष गरेर भारतसँग खुला सीमा रहेका मोरङ, सुनसरी, झापा, इलामलगायतका जिल्लामा लागूऔषधसँग सम्बन्धित घटना अत्यधिक रहेको प्रदेश प्रहरी कार्यालय विराटनगरले जनाएको छ । लागूऔषध बरामद हुने र मानिस पक्राउ पर्ने क्रम बढिरहँदा नेपाली समाज लागूऔषधको दलदलमा फस्दै गइरहेको पुष्टि हुन्छ ।