विराटनगर । नेपाल भारत – सीमा क्षेत्र विराटनगरको दक्षिण क्षेत्रबाट भन्सार छली गरेर भित्र्याइएका लत्ता कपडा र खाद्यान्यको सामान सशस्त्रले अहिले दैनिक जसो बरामद गर्दै आएको छ । सशस्त्र प्रहरी कोशी प्रदेश पकली सुनसरीका सादा पोशकमा सशस्त्र प्रहरी परिचालन गरेपछि विराटनगरको दक्षिण गेट र दरैया बस्ती हुँदै तस्करी भएर विराटनगरमा भित्रिएको लत्ता कपडा र खाद्यान्य बरामद गदै आएको छ ।

सशस्त्र प्रहरी कोशीका डिआइजी अन्जली पोखरेलले खटाएको सादा पोशकको टोलीले सोमबार विराटनगरको एयरपोट रोडबाट ठुलो परिमाणको तस्करीको कपडा बरामद गरेको छ । ४ लाख ७९ हजार ४५० रुपैयाँको कपडा सशस्त्र प्रहरीले बरामद गरेको हो । उक्त कपडा क्यारिङ गर्ने विराटनगर १६ दरैयाका गणेश साहको रहेको सशस्त्र प्रहरीले जनाएको छ । उनले नेपाल प्रहरीसँग सेटिङ मिलाएर तस्करीको कपडा जोगवनीबाट विराटनगरको एयरपोट रोडमा घर भाडामा लिएर लत्ता कपडा राख्ने गरेको सशस्त्र प्रहरीका सादा पोशकका टोलीले सूचना पाएको थियो । विराटनगर भन्सारका कर्मचारी लिएर उनीहरुले साहको गोदाममा छापा हानेर ठुलो परिमाणको कपडा बरामद गरेको हो । गणेश अहिले विराटनगरमा तस्करीको धन्दा चलाउने ठुलो क्यारिङ गर्ने तस्कर रहेको प्रहरीले बताएको छ ।

उनलाई विराटनगरदेखि पुर्वका ठुला होलसेलका कपडा व्यापारीले क्यारिङ गर्ने जिम्मा दिने गरेका छन् । उनले मोटो रकम लिएर क्यारिङ मार्फत भन्सार छली गरेर व्यापारीको पसल र गोदामसम्म तस्करीको कपडादेखि खाद्यान्यसम्म पढाउने गर्दछन् । यसरी तस्करीको सामान पु¥याउन सहज गरिदिन वडा प्रहरी कार्यालय विराटनगरका सादा पोशकका प्रहरी परिचालन भएको स्रोतको दाबी छ । सशस्त्र प्रहरीले गणेश साहको साउन १० गतेदेखि हालसम्म २२ लाख भन्दा बढी रकमको तस्करीको लत्ता कपडा बरामद गरेर विराटनगर भन्सार कार्यालयलाई बुझाइसकेको छ । सशस्त्रले तस्करीको लत्ताकपडा र खाद्यान्य बरामद गर्दा नेपाल प्रहरीले तस्करलाई छुट दिँदा उनीहरुले दिउँसै खुलेआम तस्करीको साम्रगी भित्र्याउने गरेको खुलेको छ।

डिउटीमा प्रहरी खटिएको भएता पनि उनीहरु केवल तस्करहरुको सुरक्षामा खटिएको जस्तो देखिन्छन् । गणेश साहसहित विराटनगरका अक्बर, मन्जर र आकाशको समूहले आँखै अगाडि तस्करी भइरहेता पनि केही पनि सोधपुछ नगरी निर्बाध आवतजावत गर्न दिइएको स्थानीयको आरोप छ । विराटनरको दरैया, इस्लामपुर, मटेरुवा, दक्षिण गेट क्षेत्रबाट नेपाल प्रहरीको मिलेमतोमा तस्करी भएर आउँदा सशस्त्र प्रहरीको सादा पोशकको टोलीले तस्करीको सामान नियन्त्रणमा लिने गरेकोबाट पनि तस्करी व्यापक मात्रामा फस्टाएको पुष्टि हुने गरेको छ ।