नेकपा (एमाले) निकट विध्यार्थी संगठन अनेरास्ववियु ओखलढुंगामा व्यापक विवाद देखिएको छ । केन्द्रीय सचिव आरती भट्टराईले सर्कुलर विपरित गतिविधि गरेको भन्दै विवाद चुलिएको हो ।
अनेरास्ववियु केन्द्रीय कमिटीको दोश्रो पुर्ण बैठकले संगठनको सन्दर्भमा २३ औं राष्ट्रिय महाधिवेशनमा केन्द्रीय कमिटी र निकायमा उम्मेदवारी दिएका स्वतः साविकको जिम्मेवारीबाट मुक्त हुने र आयोजक कमिटीको नेतृत्व त्यसपछिको नेतृत्वले गर्ने उल्लेख गरिएको थियो ।
तर, ओखलढुंगा जिल्ला कमिटीबाट जिल्ला नेतृत्वले केन्द्रीय सदस्यमा उम्मेदवारी दिएकाले त्यसपछि सह संयोजक रुपक मगर स्वतः आयोजक कमिटीको संयोजक बनेका थिए ।
तर आफुले गरेको निर्णयकै बर्खिलापमा सिटिभिटी हेर्ने जिम्मा पाएकी केन्द्रिय सचिव आफ्नो कार्यक्षेत्रमा नपर्ने ओखलढुंगा जिल्लामा पुगेर भदौ २ गते कमिटी घोषणा गरेपछि विवाद छर्लङ्ग भएको हो ।
सम्वन्धित भुगोलकालाई नसमेटिकन एकलौटी गुटको भेला बोलाएपछि जिल्ला पार्टीका नेताहरुले कार्यक्रम वहिस्कार गरेको स्रोतको भनाई छ । केन्द्रीय कमिटी बैठक बमोजिम रुपक मगर स्वत आयोजक कमिटी संयोजक भएको र समानान्तर गतिबिधी गर्दै हिड्नेलाई कारबाहीका लागि अनेरास्ववियु अध्यक्ष समिक बडाललाई अनुरोध गरिएको र अध्यक्ष बडालले पनि कारबाही गर्ने प्रतिबद्धता जनाएको नेकपा (एमाले) ओखलढंगाका एक नेताले बताए ।