विराटनगर, चैत १०–प्रदेश १ का सवै स्वास्थ्य संस्थाहरुमा भोलिदेखि आकस्मिक र फिवर सेवा वाहेकका अन्य सवै सेवा बन्द रहने भएका छन् । प्रदेश १ का सामाजिक विकास मन्त्री जिवन घिमिरेले सोमबार मन्त्रालयमा पत्रकार सम्मेलन को आयोजना गरी यस्तो जानकारी दिएका हुन् ।

उनले प्रदेश सरकारले तोकेको जिम्मेवारी पूरा गर्न स्वास्थअधिकारीहरुलाई निर्देशन पनि दिए । फ्रान्सबाट केही दिनअघि नेपाल आएकी एक युवतीमा कोरोना भाइरसको संक्रमण देखिएपछि मन्त्री घिमिरेले स्वास्थ्यकर्मीहरुबाट नागरिकले ठूलो अपेक्षा राखेको भन्दै जिम्मेवारी निर्वाह गर्दे कुशलता प्रर्दशन गर्न आग्रह गरे ।

यतिखेर विश्वभर कोरोनाको जोखिम बढेको भन्दै मन्त्री घिमिरेले सर्वसाधारणलाई पनि सर्तकता अपनाउन आग्रह गरेका छन् । सो अवसरमा प्रदेश १ का स्वास्थ्य महाशाखा प्रमुख डा. सुरेश मेहताले सके सम्म घरमा सुरक्षित भएर बस्न तथा अरु व्यक्तिहरुको सम्पर्कमा नजान आग्रह गरे।

उनले शंका लागेका ब्यक्तिको सम्पर्कमा आए तत्काल चिकित्सकको परामर्शमा जान आग्रह गरे । यसैबीच मन्त्रालयले सामान्य, रुघाखोकी र ज्वरो आएमा तत्काल ९८४२०३६५९५ र ९८५२०२९१८० मा सम्र्पक गरी परार्मश अनुसारको काम गर्न समेत आग्रह गरेको छ ।