विराटनगर । कोशी प्रदेश आइटिएफ तेक्वान्दो संघले पदक जित्ने तेक्वान्दोका खेलाडीहरुलाई सम्मान गरेको छ ।
भारतको हैदरावादमा सम्पन्न भएको ७ औं दीक्षण एशियाली आइटिएफ तेक्वान्दो प्रतियोगितामा कोशी प्रदेशबाट छनौट भएर पदक ल्याउने खेलाडीहरुलाई सम्मान गरेको हो ।

विराटनगरमा बिहीबार एक कार्यक्रम आयोजना गरी ७ स्वर्ण पदक, ६ रजत र ६ कास्य पदक गरी १९ वटा पदक जित्ने तेक्वान्दोका खेलाडीहरुलाई सम्मान गरिएको नेपाल इन्टरनेशनल तेक्वान्दो महासंघका अध्यक्ष प्रविण कुमार कार्कीले जानकारी दिए ।

अगस्ट ६ तारिकमा सम्पन्न भएको ७ औं दक्षिण एशियाली आइटिएफ तेक्वान्दो प्रतियोगितामा कोशी प्रदेशबाट छनौट भई नेपालको प्रतिनिधित्व गर्दै १० जना खेलाडीहरू सहभागि भएका थिए । जसमध्ये मोरङबाट कुसुम राजवंशीले एक्ल स्पाइरिङ्ग ५२–५८ के.जी. तील समूहको विद्यामा स्वर्ण पदक र गु्रप स्पाइरिङ्ग विद्यामा स्वर्ण पदक गरी जम्मा २ स्वर्ण पदक दिलाएकी थिइन् । त्यस्तै मोरङकै सविना मगरले एक्लै स्पारिङ्ग ४०–४६ के.जी. तौल समूहको विद्यामा स्वर्ण पदक र रातो पेटी एक्ल प्याटन विद्यामा रजत पदक गरी जम्मा २ पदक दिलाएकी थिइन् । त्यस्तै मोरङकै सोम बहादुर राजवंशीले एक्ल स्पाइरिङ्ग ४७–५२ के.जी. तौल समूहको विद्यामा स्वर्ण पदक र रातो पेटी एक्ल प्याटन विद्यामा रजत पदक गरी जम्मा २ पदक दिलाउन सफल भएका थिए । मोरङकै केरिषा आचार्यले ग्रुप स्पाइरिङ्ग विद्यामा स्वर्ण पदक, एक्लै स्पाइरिङ्ग ५८– ६४ के.जी. तौल समूहको विद्यामा रजत पदक र कालो पेटी दोस्रो डान एक्लै प्याटन विद्यामा रजत गरी जम्मा ३ पदक दिलाएकी थिइन् । मोरङकै नितेश खवास एक्ल स्पाइरिङ्ग ५८– ६४ के.जी. तौल समूहको विद्यामा कास्य पदक र ग्रुप स्पाइरिङ्ग विद्यामा कास्य पदक गरी जम्मा २ पदक दिलाएका थिए ।

त्यसैगरी झापका रोशन मगरले एक्ल स्पाइरिङ्ग ७८– ८५ के.जी. तौल समूहको विद्यामा स्वर्ण पदक र ग्रुप स्पाइरिङ्ग विद्यामा कास्य पदक गरी जम्मा २ पदक दिलाएका थिए । झापाकै श्याम प्रसाद बासकोटाले एक्लै स्पाइरिङ्ग ५२–५८ के.जी. तौल समूहमा कास्य पदक दिलाउन सफल भएका थिए । त्यसैगरी भोजपुरका विर बहादुर तामाङले एक्लै स्पाइरिङ्ग ७८–८५ के.जी. तौल समूहको विद्यामा कास्य पदक दिलाएका थिए । भोजपुरकै सजिना तामाङले ग्रुप स्पाइरिङ्ग विद्यामा स्वर्ण पदक, एक्लै स्पाइरिङ्ग ५२–५८ के.जी. तौल समूह विद्यामा रजत पदक र रातो पेटी एक्ल प्याटन विद्यामा कास्य पदक गरी जम्मा ३ वटा पदक दिलाउन सफल भएकी थिइन् । त्यसैगरी पाँचथरका आलोक राईले एक्ल स्पाइरिङ्ग ४५–५१ के. जी. तौल समूह विद्यामा रजत पदक दिलाउन सफल भएका थिए । नेपालका तर्फबाट मोरङका राजेन्द्र धिमाल र झापाका चन्द्र बहादुर तामाङले रेफ्रीको भूमिका निर्वाह गरेका थिए ।

पदक ल्याउने खेलाडीहरुलाई प्रदेश खेलकुद विकास बोर्डका सदस्य सचिब हंशराज वाग्ले, नेपाल इन्टरनेशनल तेक्वान्दो महासंघका अध्यक्ष प्रविण कुमार कार्कीले सम्मान गरेका थिए । कार्यक्रममा नेपाल आइटिएफ तेक्वान्दोका केन्द्रीय सदस्य चर्तुलाल चौधरी, कोशी प्रदेश तेक्वान्दो संघको उपाध्यक्ष राजेन्द्र धिमाल, सचिब नविन तामाङ्ग, सदस्य प्रलात राउत, कार्यक्रम संयोजक दिपेन थापा, विराटनगर ३ का वडाअध्यक्ष बासु बस्नेत, ११ का तिथेन्द्र न्यौपाने, १४ का सर्यु नारयण महतो, १९ का वडाअध्यक्ष श्याम घिमिरेलगायतको उपस्थीति रहेको थियो ।