विराटनगर । व्यवस्थापन संकायमात्र पठनपाठन गरी अब्बल शैक्षिक संस्थाको रुपमा देशभरीमै पहिचान बनाएको विराटनगरस्थित मेरील्याण्ड कलेजलाई ‘मस्ट कन्सीस्टेन्ट एकेडेमिक अवार्ड’ प्रदान गरिएको छ । मेरिल्याण्ड कलेजले शिक्षा क्षेत्रमा पुर्याएको योगदानको उच्च सम्मान गर्दै केन्द्रविन्दुले उक्त अवार्ड प्रदान गरेको हो ।

उक्त संस्थाले विभिन्न योग्य आधारमार्फत प्रत्येक वर्ष नेपालका २० उत्कृष्ट कलेज छनौट गर्ने गरेको छ । उक्त पुरस्कार नेपाल सरकारका बहालवाला मुख्य सचीव वैकुण्ठ अर्यालले प्रदान गरे । कलेजको तर्फबाट उक्त पुरस्कार कलेजका उपाध्यक्ष तथा प्रख्यात अर्थशास्त्री प्रा. डा. पि. के. झाले ग्रहण गरे । उक्त कार्यक्रममा मुख्य अतिथी नेपाल सरकारका मुख्य सचीव अर्यालले मेरिल्याण्डजस्तो संस्थालाई पुरस्कार दिन पाउदा अत्यन्तै खुशी लागेको बताए । त्यस्तै काठमाण्डौ विश्वविद्यालयको भूतपूर्व उपकुलपति डा. सुरेश राज शर्माले मेरिल्याण्को विद्यार्थी किन्जल पोख्रेल त्रि. वि. टप हुदा २०६७ सालमा विराटनगरमा मेरिल्याण्डको प्रमुख अतिथी बनेर पुरस्कार दिँदाको स्मरण र आज १३ वर्षपछि पुनः मेरिल्याण्ड उत्कृष्ट कलेजबाट पुरस्कृत भएकोमा आफु खुशीले गदगद भएको बताए ।

व्यवस्थापन शिक्षाका लागि नम्बर एक कलेजको सूचीमा पर्दै आएको मेरील्याण्ड कलेज देशभरीको उत्कृष्ट २० कलेज भित्र पर्न सफल भएको थियो । केन्द्रविन्दु अनलाइनले देशभरीको प्लस टुको नतिजा, शैक्षिक गुणस्तर, व्यवस्थापन, उत्कृष्ट फ्याकल्टी, अनुभवी प्राध्यापक, पूर्वाधारमा लगानीलाई छनौटको मापदण्ड बनाएर गरेको सर्वेक्षण अनुसार विराटनगरको मेरील्याण्ड देशभरीको ८ औं स्थानमा पर्न सफल भएको थियो ।

उपत्यका बाहिर अर्थात मोफसलका शैक्षिक संस्थामध्ये सर्वोत्कृष्ट स्थान हासिल गर्न मेरील्याण्ड सफल भएको छ । उत्कृष्ट नतिजा सँगै गुणस्तरीय शिक्षा प्रदान गरेको कारणले मेरील्याण्ड विद्यार्थी र अभिभावकको पहिलो रोजाईमा पर्ने गरेको यो कलेज विराटनगर – ७ रंगेली रोडमा अवस्थित छ । सक्षम नेतृत्व, कुशल व्यवस्थापन, उत्कृष्ट शैक्षिक वातावरण तथा मिहेनती प्राध्यापक, शिक्षक शिक्षिकाहरुका कारणले देशभरीको उत्कृष्ट सूचीमा परेको मेरील्याण्ड कलेजका प्रिन्सपल लक्ष्मण ढकालले जानकारी दिए ।