काठमाडौं, फागुन १९–सरकारले चीनबाट उद्धार गरी ल्याएका १ सय ७५ जनामा कोरोना भाइरस नदेखिएको अधिकारीहरूले बताएका छन् । प्रयोगशाला परीक्षणमा कोरोना भाइरसको संक्रमण नदेखिएपछि खरिपाटीस्थित क्वारेन्टाइनमा राखिएका उनीहरूलाई आजै घर पठाउन लागिएको स्वास्थ्य तथा जनसंख्या मन्त्रालयका प्रवक्ता डा. विकास देवकोटाले जानकारी दिए ।

देवकोटाका अनुसार, विश्व स्वास्थ्य संगठनको मापदण्ड बमोजिम १४ दिनपछि पुनःपरीक्षण गर्दा पनि नेगेटिभ नै आएको हो । उनीहरूको नमुना शनिबार संकलन गरिएको थियो । नेपालबाट अध्ययन र व्यवसायका लागि चीन गएका नेपाली नागरिकहरूलाई सरकारले नेपाल वायु सेवा निगमको जहाजबाट ४ फागुनमा उद्धार गरी ल्याएको थियो ।