विराटनगर । विराटनगरको पूर्व भएर बग्ने सिंघिया खोलाको बाढी सुकुम्बासी बस्तीमा पसेको छ । दुई दिनदेखि लगातार परेको वर्षाले सिंघिया खोलाको बाढी विराटनगर १ गंगाटोला र विराटनगर २ को सुकुम्बासी बस्तीमा पसेको हो ।

सिंघिया खोलाको बाढी सुकुम्बासी बस्तीमा पस्दा अधिकांश क्षेत्र डुबानमा परेको विराटनगर २ का वडाअध्यक्ष कुमार पोखरेलले जानकारी दिए । बाढी बस्तीमा पस्दा विराटनगर १ गंगा टोल र विराटनगर २ को सुकुम्बासी बस्तीको एक सय घर डुवानमा परेको उनले बताए ।

यस्तै जहदा गाउँपालिका वडा न –३ सिंघिया नदी किनारमा बसोबास गर्दै आएका सुकुमबासीहरूका ३ घर खोलाले बगाएको छ। आफ्नो घर खोलाले बगाएपछि उनीहरु अहिले खोला किनारमै पालमुनि बस्न बाध्य छन् ।

विराटनगर र कटहरी गाउँपलिका सयौ परिवार विस्थापित समेत भएका छन् । अविरल वर्षापछि आएको बाढीका कारण विराटनगर महानगरपालिकाको सिंघिया खोला किनारका बासिन्दाको घरआँगनमा बाढीको पानी पसेको छ ।

शुक्रबार बिहानैदेखि खोलाको जलस्तर बढदै गएर सुकुमबासी परिवारका घरहरुमा बाढी पसेको थियो । लगातार बाढीको जलस्तर बढदै गएपछि उनीहरु घरभित्रका सरसामान लिएर सुरक्षित स्थानतर्फ लागेका छन् । बाढीका कारण बालबालिका र ज्येष्ठ नागरिक सबभन्दा बढी प्रभावित भएका छन् ।

सिंघिया खोलामा बाढी आएपछि विराटनगर महानगरपालिकाको तटियक्षेत्रका अन्य सुकुमबासी टोलबस्ती समेत डुबानमा परेका छन् । पहिल्यैदेखि सर्तकता नअपनाएका कारण अकस्मात गाईवस्तु र मालसामान लिएर अन्यत्र सुरक्षित स्थानमा सर्नुपर्ने भएपछि पीडित थप समस्यामा परेका छन् ।