विराटनगर । कोशी प्रदेशका मुख्यमन्त्री उद्धब थापाले तीन मन्त्री नियुक्त गरेका छन् । नवनियुक्त मन्त्रीहरूले आज प्रदेश प्रमुख पर्शुराम खापुङ समक्ष शपथसमेत लिएका छन् ।

माओवादीबाट नियुक्त भएका जीवन आचार्य र राजेन्द्र कार्की, नेपाली काङ्ग्रेसबाट नियुक्त भएका रामकुमार खत्रीले पद तथा गोपनीयताको शपथ लिएका हुन् ।

उनीहरूमध्ये प्रधानमन्त्री एवं माओवादी अध्यक्ष प्रचण्डका ज्वाई आचार्यलाई आर्थिक मामिला तथा योजना मन्त्रालयको जिम्मेवारी तोकिएको छ । अन्य मन्त्रीको भने जिम्मेवारी तोकिएको छैन ।

बिहीबार मुख्यमन्त्री नियुक्त भएका थापाले शुक्रबार शपथ ग्रहण गरेका थिए । सो दिन नेपाली कांग्रेसका प्रदिप सुनुवार र एकीकृत समाजवादीका कमल जबेगुलाई मन्त्री नियुक्त गरेका थिए । उनीहरुले पनि मन्त्रालयको जिम्मेवारी पाएका छैनन् ।