विराटनगर । मोरङ प्रहरीले ३६ केजी चाँदी सहित चोरीमा संलग्न तीन जनालाई पक्राउ गरेको छ । पक्राउ पर्नेमा विराटनगर–१२ का २१ वर्षीय राजकुमार कामत, १९ वर्षीय विवेक कामत र २२ वर्षीय श्रीकान्त दास रहेको मोरङ प्रहरीले जनाएको छ ।
पक्राउ परेका प्रतिवादीहरू पेसेवर चोरीमा संलग्न गिरोह रहेको प्रहरीले जनाएको छ ।

उनीहरूले ३ जेठमा राती ९ः४५ बजे विराटनगर ३ पिपलचौकस्थित जयकिशोर चौधरीको घरबाट २० तोला सुन, ३६ केजी चाँदी चोरी गरेको आरोप छ । चोरी गरेको एक हप्तापछि चाँदी बिक्री गर्न भारत लैजाने क्रममा प्रहरीले उनीहरूलाई विराटनगर १२ कोशीप्रोजेक्टबाट पक्राउ गरेको मोरङ प्रहरीका प्रमुख एसपी दीपक पोखरेलले जानकारी दिए ।
प्रहरीले उनीहरुको साथबाट ३६ केजी चाँदी, आठ ग्राम सुन, २ हजार ५ सय भारु १ हजार ७३० नेरु बरामद गरेको छ । चोरी गरेको २० तोला सुन भारतको जोगवनीमा बिक्री गरेको पक्राउ परेका प्रतिवादीहरुले बयानको क्रममा प्रहरीलाई बताएका छन् । उनीहरुले भारतको जोगवनीमा ७ लाखमा वेचेको प्रहरीको प्रराम्भिक अनुसन्धानबाट खुलेको एसपी पोखरेलले बताए ।
बरादम गरेको चाँदी, सुन र पक्राउ परेका आरोपीहरुलाई प्रहरीले बिहीबार पत्रकार सम्मेलन गरी सार्वजानिक गरेको छ । चोरीको जानकारी पाउन साथ सुक्ष्म अनुसन्धान गरी चोरीमा संलग्नसमक्ष पुग्न सकिएको प्रहरीले जनाएको छ । पक्राउ परेका समूहले २० तोला सुन र ३६ तोला चाँदी १५ मिनेट भित्रमा चोरेर फरार भएको अनुसन्धानबाट खुलेको एसपी पोखरेलले जानकारी दिए । ‘घरको ढोका फोरेर भित्र प्रवेश गरेको १५ मिनेट भित्रमा चोरेर सुन र चाँदी ब्यागमा हालेर फरार भएको खुलेको छ,’ उनले भने, ‘त्यसपछि चोरी गरेको सामान ब्यागमा हालेर तीनै जना प्रतिवादीहरु हाटखोला स्थित दिव्यरत्न होटेलमा ३ दिन बसेको खुलेको छ ।’

पक्राउ परेका तीन जना प्रतिवादी चोरी गर्ने घरका छिमेकी हुन् । उनीहरुले पहिलादेखि घर रेकी गरेर कोही नभएको मौका छोपेर चोरी गरेको प्रहरीले जनाएको छ । ‘चोरीमा पक्राउ परेका प्रतिवादीहरू अरु चोरीको घटनामा पनि संलग्न रहेको हुनसक्न भएकोले हामीले त्यस विषयमा पनि अनुसन्धान सुरू गरेका छ,’ एसपी पोखरेलले भने ।
पक्राउ परेकाहरू चोरी कार्यमा यसअघि पनि सजाय भुक्तान गरी जेलबाट छुटेका थिए । विवेक कामत चोरी मुद्दामा यसअघि २०७९ साउन २२ गते देखि ९ महिना कैद भुक्तान गरेपछि वैशाख २८ गते छुटेका थिए । श्रिकान्त दास डाँका चोरी मुद्दामा २०७७ पुस २९ गते २० महिनाको सजाय भुक्तान गरेर २०७९ असोज ३ गते छुटेका थिए । कारगारबाट कैद भुक्तान गरेपछि उनीहरु पुरानै धन्दामा लागेको पाइएको छ ।
एसपी पोखरेलले चोरीको घटना बढेकोले सुरक्षा सावधानी अपनाउन सर्वसाधरणलाई आग्रह गरे । सवारीधनीहरुले अतिरिक्त लक एवं सुरक्षाका उपायहरु नअपनाउँदा चोरी हुने संख्या समेत बढ्दै गएको सवारी धनीपनि सचेत हुनुपर्ने उनले बताए ।