विराटनगर । विराटनगरमा मुख्य कार्यालय रहेको सप्तकोसी विकास बैंक घोटाला प्रकरणमा बैंकका तत्कालीन सीईओ नवीन सुवेदीसहित ३ जनालाई थुनामा राख्न उच्च अदालत विराटनगरले दिएको आदेश सर्वोच्च अदालतले पनि सदर गरेको छ ।
सुवेदीसहित बैंकका तत्कालीन लेखा प्रमुख देवीप्रसाद भण्डारी र जनरल सर्भिस डिपार्टमेन्ट प्रमुख हिमाल भट्टराईलाई पुर्पक्षका लागि थुनामा राख्न उच्चले दिएको आदेश सर्वोच्चले शुक्रबार सदर गरेको हो ।

उच्चले थुनामा राख्न दिएको आदेश विरुद्ध अभियुक्तहरुले सर्वोच्चमा पुनरावेदन गरेका थिए । उनीहरुको निवेदनमाथि सुनुवाइ गर्दै सर्वोच्चका न्यायाधीश अनिलकुमार सिन्हा र कुमार रेग्मीको संयुक्त इजलासले उच्चको आदेश सदर गरेको हो ।

उच्चका तत्कालीन मुख्यन्यायाधीश तिलप्रसाद श्रेष्ठ र न्यायाधीश मुरारीबावु श्रेष्ठको संयुक्त वाणिज्य इजलासले सुवेदी, भण्डारी र भट्टराईलाई थुनामा राखेर मुद्दाको पुर्पक्ष गर्न २०७८ साल फागुन १३ गते आदेश दिएको थियो । उच्चले बैंकका अपरेसन प्रमुख अमित थापामगरलाई भने २ लाख रुपैयाँ धरौटीमा छाड्न आदेश भएको थियो ।

सो मुद्दामा रकमको कारोबार भएको खाता सञ्चालक बबिता सुवेदीलाई पनि उच्चले थुनामा राख्न आदेश दिएको थियो । सर्वोच्चले सुवेदी, भण्डारी र भट्टराईको हकमा उच्चको आदेशलाई सदर गरेको सह–रजिष्ट्रार नारायण रेग्मीले जानकारी दिए । अब उनीहरुले थुनामा रहेरै मुद्दाको पुर्पक्ष गर्नुपर्ने भएको छ । खातावाल बबिता सुवेदीलाई भने धरौटीमा छाड्न सर्वोच्चले आदेश दिएको छ ।

बैंकको कर्पोरेट कार्यालय विराटनगरबाट १५ करोड रुपैयाँ बढी अपचलन गरेको खुलेपछि बैंकका सिईओ सुवेदीसहित ५ जना कर्मचारीलाई पक्राउ गरेर प्रहरीले घटनाको अनुसन्धान थालेको थियो । राष्ट्र बैंक र सप्तकोसी डेभलपमेन्ट बैंकले दिएको जाहेरीका आधारमा रकम घोटालामा संलग्नविरुद्ध प्रहरीले बैंकिङ कसूरको मुद्दामा अनुसन्धान गरि मुद्दा दर्ता गरेको हो ।

अनुसन्धानबाट सीईओ सुवेदीको योजनामा २०७२ साल चैतदेखि २०७८ मंसिरसम्म लगातार भुक्तानी लिएर बैंकको १५ करोड ७५ लाख ४० हजार ५ सय ७५ रुपैयाँ घोटाला गरिएको खुलेको थियो । सुवेदीले बैंकका महत्वपूर्ण निकायमा आफन्तलाई भर्ती गरेर रकम घोटाला गरेको पाइएको छ ।

सो प्रकरणमा बैंकका ९ जना कर्मचारी र ३ जना खातावालासहित १२ जनालाई प्रतिवादी बनाएर उच्च अदालत विराटनगरमा २०७८ फागुनमा मुद्दा दर्ता भएकोमा बैंकका सहायक होमप्रसाद पौडेल हाजिर जमानीमा छुटेका थिए । यस्तै कार्यालय सहयोगी चूँडाबहादुर निरौला, सहायक पदबाट राजीनामा दिएका निश्चल सुवेदी, कनिष्ठ सहायक पदबाट राजीनामा दिएकी समीक्षा अधिकारी, वरिष्ठ सहायक शुभेच्छा निरौला, खातावाला कमल दाहाल र मनोज भट्टरार्ई धरौटीमा छुटेका थिए ।