विराटनगर, २३ वैशाख । मोरङको बेलबारी नगरपालिकामा राप्रपाबाट मेयर उम्मेदवार बनेका खेमप्रसाद गौतमको गाडीमा आगजनी भएको छ ।

उनको बा १२ च ९३८४ नम्बरको कारमा आगजनी भएको हो । बेलबारी–२ स्थित घरमै पार्किङ गरेर राखेको अवस्थामा कारमा शुक्रबार बिहान करिब २ बजे आगजनी भएको प्रहरीले जनाएको छ ।

प्रहरीले आगजनीमा संलग्न भएको आरोपमा एक जनालाई पक्राउ गरेको छ । पक्राउ पर्नेमा सुन्दरहरैंचा नगरपालिका–१२ का अन्दाजी २८ वर्षीय सुवास पाण्डे रहेका छन् ।

उम्मेदवार गौतमले यही ३० गते हुन लागेको स्थानीय निर्वाचनको प्रचारप्रसारका क्रममा पार्टीको झण्डा तथा मेयर र उपमेयरका उम्मेदवारको फोटोसहितको ब्यानर राखेर कार प्रयोग गर्दै आएका थिए ।