काठमाडौं, १८ माघ । सोमबार दोहोरो अंकले घटेको शेयरबजार परिसूचक नेप्से कारोबारको तेस्रो दिन मंगलबार १९.२९ अंकले बढेको छ । आज बजार बढेसँगै सेन्सेटिभ इन्डेक्स पनि ३.९८ अंकले बढेर ५४२.९० बिन्दुमा पुगेको छ ।

सोमबार २८७५.०५ बिन्दु कायम भएको नेप्से परिसूचक आज २८९१.३३ बिन्दुमा पुगेको छ । यस्तै, आज कारोबारमा आएका २२३ वटा कम्पनीको १ करोड २१ लाख कित्ता शेयर ६ अर्ब ५७ करोड ४८ लाख रुपैयाँमा कारोबार भएको छ । 

बजार बढेसँगै नौवटा समूहका सूचकमा हरियाली छाएको छ भने चारवटा समूहका सूचकहरू राताम्मे देखिएको छ । यस दिन सर्वाधिक हाइड्रोपावर समूहको ३.२२ प्रतिशतले शेयरमूल्य वृद्धि हुँदा व्यापार समूहको ०.५३ प्रतिशतले घटेको छ ।

बजार बढेसँगै आज विन नेपाल लघुवित्तको शेयरमूल्यमा सकारात्मक सर्किट लागेको छ भने बुद्धभूमिको शेयरमूल्य ९ प्रतिशतभन्दा बढीले वृद्धि भएको छ । विन नेपाल लघुवित्तको शेयरमूल्य प्रतिकित्ता १६१ रुपैयाँले वृद्धि भएर १ हजार ७ सय ८१ रुपैयाँ कायम भएको छ ।

यस्तै, सर्वाधिक गुमाउनेमा नेरुडे लघुवित्त विकास बैंक छ । उक्त कम्पनीको शेयरमूल्य प्रतिकित्ता ४० रुपैयाँले घटेर १ हजार २ सय २० रुपैयाँ पुगेको छ ।

मंगलबार सर्वाधिक शेयर कारोबार भने नेसनल हाइड्रोपावरको ३९ करोड १ लाखभन्दा बढी कित्ता शेयर कारोबार हुँदा शेयर मूल्य प्रतिकित्ता ४ सय १७ रुपैयाँ पुगेको हो ।