विराटनगर । कक्षा १२ को वार्षिक परीक्षा यही आउँदो वैशाख २६ गतेबाट सुरु हुँदैछ । राष्ट्रिय परीक्षा बोर्ड, परीक्षा नियन्त्रण कार्यालय भक्तपुरले २०८० वैशाख २६ गतेदेखि हुने परीक्षाको समय तालिका यसअघि सार्वजनिक गरिसकेको छ । जेठ ४ गते सकिने परीक्षा नियन्त्रण कार्यालयले जनाएको छ ।

परीक्षाको मिती नजिकिएसँगै बिद्यार्थीको ध्यान पढाइमा केन्द्रित छ । कसरी राम्रो नतिजा हासिल गर्ने ? अक्सर बिद्यार्थीको ध्याउन्न यहिं हुने गर्छ । एक हिसावले यो सहि पनि हो । तर, नतिजाको दौडमा लाग्दा त्यसले तनाव निम्त्याउँछ, जो परीक्षाको बेला प्रत्युत्पादक हुन सक्छ ।

परीक्षाको बेला तनावमुक्त भएर कसरी राम्रो नतिजा हासिल गर्ने विराटनगरस्थित मेरील्याण्ड कलेजका प्रध्यापक भेषराज पोखरेले विद्यार्थीलाई दिएको १८ टिप्स :

१ .अध्ययनलाई तनावरहित बनाउँनुहोस् ।
२. नियमित निश्चित समय (टुक्राटुक्रा समय) मा अध्ययन गर्नुहोस् ।
३ .लगातार पढिमात्रै राख्नुभन्दा बीचबीचमा केही समय खाली राख्नुहोस् ।
४ .परीक्षा अवधिभर अन्य समयको भन्दा केही बढी अध्ययन आवश्यक हुन्छ ।
५ .साथीभाइसँग अन्लाइन –अफलाइन कुरा गर्दा पनि विषयवस्तुमै केन्द्रित हुनुहोस् ।
६ .लगातार अध्ययन गर्दा शारीरिक थकान बढ्ने हुनाले बीचबीचमा सामान्य हिँडडुल गर्नुहोस् ।
७ .आफूलाई हरबखत खुसी राख्दा स्मरण शक्तिमा सकारात्मक प्रभाव पर्ने हुनाले घरिघरि मनपर्ने गीत सुन्नुहोस् ।
८ .धेरै नम्बर कसरी ल्याउने भन्ने चिन्ता लिनुको साटो क्षमता अनुसार राम्रो गर्ने कोसिस गर्नुहोस् ।
९ .दिइसकेको परीक्षा राम्रो भएन भन्ने कुरालाई चटक्कै बिर्सेर आउने परीक्षालाई कसरी सफल बनाउने कुरामा ध्यान दिनुहोस् ।
१०. आत्तिने, निराश हुने, बिग्रेला भनेर डराउने काम कदापि नगर्नुहोस् ।
११ .कहिलेकाहीँ राम्रो मानिएको विषयमा कम नम्बर र नराम्रो मानिएको विषयमा धेरै नम्बर पनि आउने गर्छ त्यसैले जेजस्तो भएपनि चिन्ता मुक्त रही सकारात्मक नतिजा आउने कुरामा विश्वस्त रहनुहोस् ।
१२. धेरै नम्बर ल्याउन सक्दा मात्रै सफलता पाइन्छ भन्ने कुरामा नलाग्नुहोस् ।
१३ .सफल हुन परीक्षा अवधिभर केवल ८–१० घन्टा गम्भीर भएर पढ्दा पर्याप्त हुन्छ ।
१४ .रातभर अनिदो बसेर शरीर र मस्तिष्कलाई शिथिल नबनाउनु होस् ।
१५ .ग्याप छँदै छ भोलि पढिहाल्छु नि भन्ने नसोच्नुहोस् बरु यति पढिसकेर ढुक्क भएर बस्छु भन्ने सोच्नुहोस् ।
१६ .पढ्ने क्रममा केही आलस्य महसुस भएमा बीचबीचमा थोरै थोरै पानी पिउनुहोस् ।
१७ .मेरो सफलताबाट मलाईभन्दा धेरै खुसी ममी बाबालाई प्राप्त हुन्छ भन्ने कुरा हरपल सोच्नुहोस् ।
१८ .मैले गरेको गल्ती र लापरबाहीले उहाँहरूलाई जीवनभर पीडा दिन्छ भन्ने कुरामा सजग रहनुहोस् ।

मेरो सफलता नै ममी बाबाको वास्तविक खुसी हो र असफलता नै उहाँहरूको आँसुको कारण हो भन्ने सोच्नुहोस्
यति कुरामा ध्यान दिन सक्नुभयो भने तपाईंले यो परीक्षा मात्र होइन जीवनको कठिन परीक्षालाई पनि सजिलै जित्नु हुने छ। तपाईंले सफलताको पछि दगुर्नु पर्दैन सफलताले तपाईंलाई खोज्दै आउने छ।