विराटनगर, २१ असार । संखुवासभाको मादी नगरपालिकामा भएको कार्की परिवार हत्या प्रकरणमा संलग्न दोषीलाई आजीवन कारावासको सजाय सुनाइएको छ । मादी नगरपालिका–१ स्थित खोलागाउँमा एकै परिवारको ६ सदस्यको हत्या प्रकरणमा चार जनालाई जिल्ला अखालत संखुवासभाले आजीवन कारावासको सजाय भएको फैसला सुनाएको हो ।

घटनाका मुख्य योजनाकार ४७ वर्षीय खड्गबहादुर कार्की, उनका छोरा २८ वर्षीय हस्तबहादुर कार्की, ४९ वर्षीय रणबहादुर कार्की र उनका छोराद्वय २७ वर्षीय लोकबहादुर र १७ वर्षीय छोरा नरेश कार्कीलाई पक्राउ गरी सार्वजनिक गरेको थियो ।

अदालतले पक्राउ परेका खड्ग, हस्तबहादुर, रणबहादुर र लोकबहादुरलाई आजीवन कारावासको सजायको फैसला गरेको हो ।

त्यसैगरी, हत्यामा संलग्न भएका १७ वर्षीय नरेशलाई भने २५ वर्षको दुईतिहाइ कारावासको फैसला छ । उनले १६ वर्ष केही महिना कारावास बस्नुपर्ने हुन्छ ।

२१ भदौ २०७८ मा तेजबहादुर कार्कीसहित उनकी आमा पार्वती, श्रीमती कमला, बुहारी रञ्जना, नाति विपीन र नातिनी गोमाको निर्मम हत्या भएको थियो ।