काठमाडौं, ५ माघ । नेपाल आयल निगमले पेट्रोलियम पदार्थको मूल्य बढाएको छ । आज राति १२ बजेदेखि लागू हुने गरी निगमले पेट्रोल, डिजेल र मट्टितेलमा प्रतिलिटर ३ रूपैयाँ मूल्य बढाएको हो ।

मूल्यवृद्धिपछि काठमाडौंको लागि (निगमको डिपो क्षेत्रको १५ किमि परिसरभित्र) पेट्रोलको खुद्रा मूल्य १३९ रूपैयाँ पुगेको निगमले जनाएको छ । त्यस्तै डिजेल र मट्टितेलको मूल्य १२२ रूपैयाँ पुगेको छ ।

निगमले आन्तरिक हवाइ इन्धनमा साविकको मूल्यमा प्रतिलिटर पाँच रूपैया वृद्धि गरी प्रतिलिटल १०६ रूपैयाँ पुर्‍याएको छ । त्यस्तै अन्तर्राष्ट्रिय हवाइ इन्धनको मूल्य प्रतिकिलोलिटर १०० अमेरिकी डलर वृद्धि गरी ९९५ अमेरिकी डलर पुर्‍याइएको छ ।

खाना पकाउने एलपी ग्यासमा भने घाट भए पनि हाललाई मूल्य नबढाइएको निगमले जनाएको छ ।

मूल्यवृद्धिपछि पनि १५ दिनमा १ अर्ब ८८ करोड रूपैयाँ घाटा हुने निगमले जनाएको छ । जसअनुसार १५ दिनमा पेट्रोलमा करिब ३४.८१ करोड, डिजेलमा करिब ५७.४३ करोड घाटा हुने निगमको भनाइ छ । मट्टितेलमा भने १५ दिनमा २,०७ करोड नाफा हुने निगमले जनाएको छ । मूल्यवृद्धिपछि हवाइ इन्धनमा आन्तरिकतर्फ १५ दिनमा करिब २.६१ करोड र वाह्यतर्फ १३.७९ करोड नाफा हुने निगमले जानकारी दिएको छ ।

निगमका अनुसार एलपी ग्यासमा अहिले प्रतिसिलिन्डर ६४६.१६ रूपैयाँ घाटा भइरहेको छ । जसअनुसार १५ दिनमा ११४.८६ करोड घाटा हुने निगमले जनाएको छ ।