विराटनगर, १८ मंसिर । नेपाली कांग्रेस प्रदेश १ को अधिवेशनअन्तर्गत नेतृत्व चयनका लागि मतदान सुरु भएको छ । यसअघि मतपत्रमा तीन जना उम्मेदवारको नाम छुटेपछि मतदान रोकिएको थियो ।

बिहान ८ बजेदेखि मतदान हुने भनिए पनि मतपत्रमा इलामबाट सदस्यमा उठेका श्याम खड्की, शान्तिकला तामाङ राई र जीवन नेपालीको नाम छुटेपछि विवाद भएको थियो । जसका कारण रोकिएको मतदान प्रक्रिया केहीबेरअघि सुरु भएको हो ।

मतपत्रमा छुटेका उम्मेदवारको नाम समेटेपछि मतदान सुरु भएको निर्वाचन समितिका अधिकृत भरत थापाले जानकारी दिए ।

नेपाली कांग्रेस प्रदेश १ को नेतृत्वका लागि प्यानलसहित उम्मेदवारी दर्ता भएको छ । सभापतिमा देउवा‒सिटौला समूहबाट झापाका उद्धव थापा र कोइराला–पौडेल समूहबाट केन्द्रीय सदस्य गुरुराज घिमिरेले प्यानलसहित उम्मेदवारी दिएका छन् ।

प्रदेश उपसभापतिमा गोविन्द ढुगाना, टंक राई, विश्वनाथ रिजाल र रमेशजंग रायमाझीले उम्मेदवारी दिएका छन् भने महामन्त्रीमा दिपेन श्रेष्ठ, भूपेन्द्र राई, उमेश थापा र पद्मसुन्दर पालुङ्वा प्रतिस्पर्धामा छन् ।

सहमहामन्त्रीमा प्रमिला गच्छदार, मानबहादुर लिम्बु, अञ्जना ताम्ली, रोहित राई, शुभचन्द्र राई, सीता कार्की, वीरकाजी राई, विनोदकुमार वस्नेत, खड्ग फागो र इन्दिरा थापाले उम्मेदवारी दर्ता गराएको निर्वाचन समितिले जनाएको छ ।

प्रदेश अधिवेशनले एक सभापति, दुई उपसभापति, दुई महामन्त्री र ४ सहमहामन्त्री निर्वाचित गर्ने छ । सहमहामन्त्रीमा २ महिला र २ खुल्ला निर्वाचित हुनेछन् ।