धनगढी, जेठ २५-सेती प्रादेशिक अस्पतालको डायलासिस वार्डमै मृत्युपश्चात कोरोना पुष्टि भएकी महिलाको मलामी गएका व्यक्तिहरूलाई प्रहरीले सम्पर्कमा ल्याएको छ । प्रहरीका अनुसार महिलाको टोलसहित घोडाघोडी नगरपालिका- ३ का ८ र बर्दोगोरिया गाउँपालिका- २ का दुई गरी ४९ जना सम्पर्कमा आएका हुन् ।
मृतकलाई सेती प्रादेशिक अस्पतालसम्म लैजाने तथा उनको शव ल्याउने अटो चालक, आर्यघाटसम्म शव लैजाने ट्रयाक्टर चालक पनि सम्पर्कमा आएका छन् । मलामीसहित उनीहरु सबैको पीसीआर परीक्षण गर्ने तयारी भइरहेको प्रहरीले जनाएको छ।
धनगढी उपमहानगरपालिका- ४ की ५५ वर्षीय महिलाको शुक्रबार दिउँसो डायलासिस वार्डमै मृत्यु भएको थियो । उनको शनिबार बिहान अन्त्येष्टि गरिएको थियो । लामोसमयदेखि मिर्गौलासम्बन्धी रोगबाट पीडित उनी डायलासिस गराउन सेती अस्पताल पहिलोपटक पुगेका थिइन् ।
डायलासिसअघि उनको आरडीटी रिपोर्ट भने नेगेटिभ आएको थियो । मृत्युपछि थ्रोट स्वाबको नमूना संकलन गरी धनगढी प्रयोगशालामा पठाइएकोमा कोरोना पुष्टि भएको हो । मृतकमा कोरोना पुष्टि भएपछि डायलासिस वार्ड सिल गरिएको छ । मृतक महिला यसअघि काठमाडौंमा उपचार गराएर फर्किएकी थिइन् ।
जिल्ला प्रहरी कार्यालयका इन्स्पेक्टर हिक्मत थापाले स्थानीय प्रशासन, जनप्रतिनिधि र स्थानीयको समन्वयमा शनिबार साँझदेखि मृतक महिलाको टोल सिल गरिएको जानकारी दिए । वडा नम्बर ४ का अध्यक्ष दीपक थापाले टोल सिल गर्दै आवतजावतमा पूर्ण रुपमा रोक लगाइएको बताए ।
