विराटनगर, १६ कात्तिक । ५ अर्ब रुपैयाँ भन्दा बढीको लगानीमा विराटनगर–९ स्थित गुद्रीमा निर्माण हुने व्यापारिक कमप्लेक्सका लागि महानगरपालिकाले सुचना निकालेको छ । विराटनगर–९ स्थित गुद्रीबजार क्षेत्रको १४ कट्ठा जग्गामा बन्ने सो व्यापारिक कमप्लेक्सका लागि महानगरपालिकाले सुचना निकालेको हो ।

महानगरपालिकाले प्रदेश सरकार र प्रदेश १ लगानी प्राधिकरणबिच भएको समझदारी बमोजिम गुद्री बजारस्थित ‘इ प्लट’ मा अन्तराष्ट्रिस्तरको सुविधा सम्पन्न व्यापारिक बन्ने भएकाले सो स्थानको जग्गा खालि गर्न सुचना जारी गरेको हो ।

महानगरले आगामी १५ दिन अर्थात कात्तिक २९ गतेभित्र गुद्री क्षेत्रमा रहेका जग्गा खालि गर्न अल्टिमेटम दिएको हो । महानगरले अहिले सो स्थानमा रहेका घर, टहरा र सटरहरुमा व्यापार व्यवसाय गर्नेहरुलाई स्थान खालि गर्न भनेको छ ।

‘प्रदेश सरकार र प्रदेश १ लगानी प्राधिकरणबिच हालको गुद्री बजारमा अन्तराष्ट्रिस्तरको सुविधासम्पन्न व्यापारिक भवन बनाउन समझदारी भएको छ ।’ सुचनामा भनिएको छ,‘उक्त स्थानमा रहेका घर, सटर र टहराहरु हटाई साइट क्लियर गर्नुपर्ने भएको हुँदा सो स्थानमा व्यापार व्यवसाय सञ्चालन गरि बसेका सवैलाई कात्तिक २९ गतेभित्र घर, टहरा र सटरहरु खालि गरिदिनुहुनका लागि जानकारी गराइन्छ ।’

केही दिन अघि विराटनगर महानगरपालिकामा आयोजित एक कार्यक्रमका बीच महानगर र प्रदेश सरकार प्रदेश नं.१ ले व्यापारिक कमप्लेक्स बनाउने विषयमा समझदारी गरेका हुन् । परियोजनाको काम आगामी तीन महिनाभित्रै सुरु हुने महानगरले जनाएको छ । व्यापारिक कमप्लेक्स भवन ३ वर्षभित्र बनाइसक्ने योजना छ ।