काठमाडौ, पुस २२–प्रमुख प्रतिपक्षी दल नेपाली कांग्रेसकी केन्द्रीय सदस्य सुजाता कोइरालाले नेपालको कालापानी, लिपुलेक र लिम्पियाधुरा भारतलाइ लिजमा दिनुपर्ने धारणा व्यक्त गरेकी छिन् । आइतबार राति ८ः०० बजे प्राइम टाईम्स टेलिभिजनबाट प्रशारण हुने ‘जनता जान्न चाहन्छन्’ कार्यक्रममा पत्रकार ऋषि धमलासँग कुरा गर्दै नेतृ कोइरालाले नेपाली भूभागमा व्यपार गर्न भारत इच्छुक हो भने लिजमा लिँदा हुने बताइन् ।

उनले भनिन्,‘ नेपालका कालापानी, लिपुलेक र लिम्पियाधुराको सीमा मिचिएको कुरा छ, यसको बारेमा झगडा र गाली गरेर वा पुत्ला जलाएर समस्याको समाधान हुँदैन् । यसको लागि दुवै पक्षबीच वार्ता गर्नुपर्छ । नेपाल सरकारको तर्फबाट जुन पहल हुनुपर्दथ्यो त्यो भएको छैन् । कालापानी, लिपुलेक र लिम्पियाधुरा भारतलाई लिजमा दिनुपर्यो ।’

भारतीय प्रधानमन्त्री नरेन्द्र मोदीले भारत–बंगलादेशबीचको समस्या समाधान कुशलतापूर्वक गरेको भन्दै उनले नेपालले पनि वार्ताको सम्वादलाई अघि बढाएर त्यासबाट फाइदा लिनु पर्ने बताइन् । उनले भनिन्,‘ हामी त्यो भू–भागलाई विकास गर्न सक्दैनौ, त्यसैले भारतलाई लिजमा दिएर त्यसबाट फाईदा लिन सक्छौं । ’ उनले अहिले कांग्रेसको भारतसँगको सम्बन्ध बिग्रेको टिप्पणी गर्दै भनिन्,‘भारतसँग राम्रो सम्बन्ध बनाउनुपर्छ भनेर हिँड्ने मान्छे मै हुँ । हाम्रो पार्टीमा भारतसँग मिलाउने व्यक्ति पनि मै हुँ, तर पार्टीले मलाई अहिले कुनै जिम्मेवारी दिएन।’ सभापति देउवा र बरिष्ठ नेता रामचन्द्र पौडेल अब अभिभावक भएर बस्नुपर्ने सुझाव दिँदै उनले पार्टीको नेतृत्वमा अब नयाँ पुस्ता र नयाँ फेश आउनु पर्ने बताइन् ।