विराटनगर, १ जेठ । नयाँ भेरियन्टको कोरोना महामारीको बेलामा उद्योग धन्दा संचालन गर्नुपर्ने भए उद्योगी व्यवसायीहरुले मजदुर तथा कर्मचारीहरुलाई उद्योगमै राख्नुपर्ने भएको छ । तोकिएको स्वास्थ्य सुरक्षाको मापदण्ड अपनाएर कार्यस्थल परिसरभित्रै बस्ने प्रबन्ध मिलाउनु पर्ने भएको छ ।

शुक्रबार जिल्ला प्रशासन कार्यालय मोरङले दोस्रो पटक निषेधाज्ञा जारी आदेश अनुसार उद्योगधन्दा चलाउनु पर्दा बाहिरबाट कामदार, मजदुर र कर्मचारीहरु ल्याउन र लैजान नपाउने उल्लेख छ । उद्योगहरुमा धेरै मजदुर तथा कर्मचारीहरु काम गर्ने भएकोले दैनिक रुपमा ओहोरदोहोर गर्दा कोरोना भाइरसको संक्रमण झन फैलिने अवस्था आउने भन्दै यस्तो आदेश गरिएको जनाइएको छ ।

दोस्रो चरणको निषेधाज्ञा आदेश अनुसार निषेधाज्ञा आज शनिबार राती १२ बजे सकिंदैछ । शुक्रबार जारी गरिएको नयाँ आदेश अनुसार आजै राती १२ बजेदेखि ११ गते राती १२ बजेसम्म १० दिनका लागि यस्तो नियम लागू गरिएको छ ।