सुन्दरहरैँचामा मुक्ति समाजको ५१ सदस्यीय नगर कमिटी गठन - News Birat

सुन्दरहरैँचामा मुक्ति समाजको ५१ सदस्यीय नगर कमिटी गठन

न्यूज विराट

विराटनगर, ९ फागुन । मोरङको सुन्दरहरैँचामा नेकपा (एमाले) को जनवर्गीय संगठन नेपाल उत्पीडित जातीय मुक्ति समाजको नगर कमिटी गठन भएको छ । सोमबार नेकपा (एमाले) स्थायी कमिटी सदस्य तथा पूर्वमन्त्री लालबाबु पण्डीतको प्रमुख आतिथ्यतामा सम्पन्न नगर भेलाले मदन परियारको अध्यक्षतामा ५१ सदस्यीय नगर सम्मेलन आयोजक कमिटी गठन गरेको हो ।

मुक्ति समाजको जिल्लाका १७ वटै पालिकामा जारी संगठन सुदृढीकरण अभियान अन्तर्गत कमिटी गठन भएको हो । सम्मेलन आयोजक कमिटीको उपाध्यक्षमा सुर्यकुमारी विश्वकर्मा, सचिवमा तेतबहादुर बर्देवा, सह–सचिवमा श्याम विश्वकर्मा र कोषाध्यक्षमा शारदा विश्वकर्मा चयन भएको नेपाल उत्पीडित जातीय मुक्ति समाज मोरङका अध्यक्ष किशोर विश्वकर्माले जानकारी दिए ।

कमिटीको सदस्यहरुमा मनिता कुमारी परियार संगीता दास, प्रेम परियार, राजकुमारी वि.क., हेमनी मरर, अमर बहादुर वि.क., निर्मला परियार, ज्ञानमाया सार्की, सुचीत्रा विशुन्के, सरिता नेपाली, प्रमिला अछामी, सारदा वि.क., सानुमाया वि.क.,प्रकाश परियार, गोविन्द अछामी लगायत रहेका छन् ।

भेलाले चयन गरेका पदाधिकारी तथा सदस्यहरुको घोषणा मुक्ति समाज मोरङका अध्यक्ष विश्वकर्माले गरेका थिए । नव गठित कमिटीका पदाधिकारी तथा सदस्यहरुलाई मुक्ति समाजका केन्द्रीय सदस्य दिपेन्द्र पासवानले शपथग्रहण गराएका थिए ।

नगर भेलालाई सम्बोध गर्दै नेकपा (एमाले) स्थायी कमिटी सदस्य तथा पूर्वमन्त्री लालबाबु पण्डितले विकास र समृद्धिको एजेण्डा एमालेसँग मात्र रहेकाले आगामी निर्बाचनमा एमालेलाई जिताउन जनसंगठनका गतिविधिहरु व्यापक बढाउन निर्देशन दिए ।

उनले फेरी पनि जनताको शक्ति र बलले तीनै तहको निर्वाचनमा एमालेलेनै जित्ने दावी गर्दै आफ्नो पार्टीले समृद्ध नेपाल सुखी नेपाली बनाउने अभिाभारा पुरा गर्ने बताए ।

नेता पण्डितले सिंगो दलित समुदायको हक अधिकार एमालेले मात्र स्थापित गरि कार्यान्वयन गर्ने भएकाले एमाले कमजोर बन्न नहुने बताए । उनले राजनीतिक रुपमा संगठित भएमात्र हक अधिकार प्राप्त गर्न सकिने भएकाले मुलुकमा सवैभन्दा पहिले एमालेले दलित समुदायलाई राजनीतिकरुपमा संगठित गरेको बताए ।

उनले दलित समुदायका पक्षमा बनेका ऐन, कानुनहरु बनेपनि प्रभावकारी कार्यान्वयन नभएकाले संगठित भएर खबरदारी गर्नुपर्ने बताए ।
कार्यक्रममा नेकपा (एमाले) प्रदेश कमिटी उपसचिव धना तामाङले सिंगो दलित समुदायको अधिकारका लागि सम्पूर्ण दलित समुदाय मुक्ति समाजमा संगठित हुनुपर्ने बताइन् ।

सो अबसरमा प्रदेश १ सरकारका पूर्व राज्यमन्त्री राजकुमार ओझाले बनेका ऐन कानुनहरुको प्रभावकारी कार्यान्वयन हुन नसक्दा दलित समुदाय माथि अहिले पनि जतीय विभेद र छुवाछुतका घटना भइरहेकाले त्यसविरुद्ध संगठित भएर लड्नुपर्ने बताए ।

भेलाबाट चयन भएका पदाधिकारी तथा सदस्यहरुलाई नेकपा (एमाले) प्रदेश कमिटी सदस्यहरु सत्यनारायण चौधरी, अजम्बर राई, लक्ष्मिप्रसाद फुयाल, विरेन्द्र श्रेष्ठ, मुक्ति समाज केन्द्रीय सदस्यहरु दिपेन्द्र पासवान, प्रमिला लकान्द्री, प्रदेश कमिटी सदस्य हर्कराज परियारलगायतले शुभकामना दिए । सो अबसरमा सुन्दरहैँचा नगरपालिकाका सवै वडाबाट सयौँको संख्यामा दलित समुदायको सहभागिता रहेको थियो ।

 

 

मा प्रकाशित

यसमा तपाईको मत:

© Copyright 2017 - 2022 Newsbirat pvt ltd. All Rights Reserved.

Design / Developed by codebundles