नेकपा एमालेको नेताको हैसियतमा रामबहादुर थापा बादल पुनः गृहमन्त्रीमा नियुक्त हुने भएका छन् । प्रधानमन्त्री केपी शर्मा ओलीले थापालाई एमालेको नेताको हैसियतमा पुनः गृहमन्त्रीमा नियुक्त गर्न लागेका हुन् । नेकपा माओवादी केन्द्रले थापालाई राष्ट्रियसभा सदस्यबाट हटाएपछि गृहमन्त्रीबाट पनि स्वतः पदमुक्त भएका थिए ।

प्रधानमन्त्रीका सञ्चार विज्ञ रामशरण बजगाईंले थापाको आइतबार शीतलनिवासमा साँझ ५ बजे शपथग्रहणको समय तय भएको जानकारी दिए । सांसद नरहेका व्यक्ति ६ महिनासम्म मन्त्री हुन पाउने संवैधानिक व्यवस्था छ । थापा त्यही संवैधानिक व्यवस्था अनुसार फेरि गृहमन्त्री बन्न लागेका हुन् ।

माओवादी केन्द्रबाट राष्ट्रियसभा सदस्य बनेका थापा सर्वोच्च अदालतको फैसलासँगै एमाले र माओवादी केन्द्र ब्युँतिएपछि एमालेमै बस्ने निर्णय गरेका थिए ।

माओवादी केन्द्रले पार्टीमा फर्किन आग्रह गरे पनि थापा एमालेमै बस्ने निर्णयमा पुगेका थिए । त्यसपछि माओवादी केन्द्रले थापालाई राष्ट्रियसभा सदस्यबाट हटाउने निर्णय गरेको थियो ।

थापा एमालेतिर लागेपछि माओवादी केन्द्र्रले पदमुक्त गर्न संघीय संसद् सचिवालयलाई पत्र पठाएको थियो । माओवादी केन्द्रको पत्रका आधारमा संसद सचिवालयले आइतबार बिहान थापाको राष्ट्रियसभा सदस्य पद रिक्त भएको सूचना जारी गरेको हो ।

यसअघि माओवादी केन्द्रले एमालेतिर लागेका लेखराज भट्ट, टोपबहादुर रायमाझी, प्रभु साह र लेखराज भट्टलाई प्रतिनिधिसभा सदस्यबाट हटाएको थियो ।