विराटनगर, माघ २३–विराटनगरस्थित आरोहण गुरुकुलमा ‘महाभोज’ नाटक मञ्चन सुरु भएको छ । प्रदेश–१ सरकारसँगको सहकार्यमा मण्डला नाटक समूह नेपालले हाटखोलास्थित सुशीला कोइराला नाटकघरमा महाभोज मञ्चन गरेको हो । भारतमा आयोजित भारत रंगमहोत्सवमा छनोट भएर जानेक्रममा मण्डलाले विराटनगरमा नाटक मञ्चन गरेको हो । हिन्दी साहित्यकार मन्नु भण्डारीको उपन्यासलाई नेपाली भाषामा नाट्य रुपान्तरण विप्लव प्रतीकले गरेका हुन् । जनतालाई भोटबाहेक केही नदेख्ने राजनीतिकर्मी र बाँचुञ्जेल उत्पीडनमा पारिएकाहरूको कथा देखाएको छ नाटक ‘महाभोज’ले ।

गरिब जनताको लासमाथि हुने राजनीतिमा नाटक केन्द्रित छ । लगभग ४० वर्षअगाडि लेखिएको ‘महाभोज’ लाई तीन ‘पी’ मा बुनिएको छ । तीन पी भन्नाले प्रेस, पोलिटिक्स र पुलिसलाई जनाइएको छ । राजनीति, प्रहरी र पत्रकारिता कसरी एकअर्कासँग जोडिएका छन् र त्यसको चक्रब्यूहभित्र जनता कसरी कैद छन् भन्ने विषय नाटकमा देखाइएको छ ।

नाटक हेर्न प्रदेश १ का मुख्यमन्त्री शेरधन राई, प्रदेश–१ भरिका रंगकर्ममा सक्रिय कलाकार, साहित्यकार, विभिन्न राजनीतिक दलका प्रतिनिधि, विद्यार्थीलगायतको सहभागिता थियो । नाटकमा रमेश बुढाथोकी, शेखर चापागाई, राजन खतिवडा, दिया मास्के, बुद्धि तामाङ, प्रदीपकुमार चौधरी, विजय बराल, आर्जेश रेग्मी, सोमनाथ खनाल लगायत कलाकारहरूको अभिनय रहेको छ ।