विराटनगर, १५ फागुन । कोशी सांस्कृतिक प्रतिष्ठान नेपालले विराटनगर बृहत सांस्कृतिक कार्यक्रमको आयोजना गरेको छ । प्रतिष्ठानले सहिद सप्ताहको सन्दर्भ पारेर कार्यक्रम गरेको हो ।

सो अवसरमा विराटनगर–१ स्थित विष्णुमाया पुस्तकालय परिसरमा कार्यक्रम आयोजना गरिएको हो । कार्यक्रममा गीतसंगीत, नाटक प्रहसन, नृत्य र कविता वाचनसमेत आयोजना गरिएको थियो ।

गणतान्त्रिक आन्दोलनको क्रममा शहादत दिएका सहिदहरुको सम्झनामा फागुन १४ गतेदेखि २१ सम्म आयोजना गरिने साताब्यापी कार्यक्रमअन्तर्गत बृहत सांस्कृतिक कार्यक्रम गरिएको आयोजक संस्थाका अध्यक्ष गणेश उप्रेती सुशीलले जानकारी दिए ।

कार्यक्रममा कवि सीमा आभास, मीनकुमार नवोदित, भरत गुरागाईं र कवि शशिकिरणलगायतले समसामयिक विषयमा लेखिएका आफ्ना कविताहरु वाचन गरे । कार्यक्रममा साहित्य, संगीत, कला, राजनीति, सामाजिकलगायत विभिन्न क्षेत्रका व्यक्तिहरुको बाक्लो उपस्थिति रहेको थियो ।