विराटनगर, २५ माघ । मुख्यमन्त्री शेरधन राई पक्षकाे अवराेधका कारण प्रदेश १ काे प्रदेशसभा बैठक दुई मिनेट बसेर स्थगित भएकाे छ । सत्तापक्षले नै नियमापत्ती जनाएर बैठक चल्न नदिएपछि सभामुख प्रदीपकुमार भण्डारीले ९ फागुनसम्मका लागि बैठक स्थगित गरेका हुन् । सभामुख भण्डारीले बैठक सुरु भएकाे जानकारी गराएलगत्तै सत्तारूढ नेकपा ओलीसमूहका सांसदहरूले अवराेध गरेका थिए ।

विभाजित नेकपाको ओली र प्रचण्ड-नेपाल समूहको विवादका कारण प्रदेशसभा बैठक अन्योलमा परेपछि राज्य व्यवस्था परामर्श समितिले विवाद टुंग्याउने प्रयास गरेकाे थियाे ।

तर, सरकारको तर्फबाट आन्तरिक मामिला तथा कानुनमन्त्री हिक्मतकुमार कार्कीले मुख्यमन्त्री राईविरुद्धकाे अविश्वास प्रस्ताव टेबल हुन नसक्ने र संसदीय दलको नेताको हैसियतमा मुख्यमन्त्री राईले निलम्बन गरेका १६ जना सांसद प्रदेशसभामा सहभागी हुन नपाउने अडान राखेपछि सहमति जुट्न सकेन । प्रस्ताव पेस गरेकाे प्रचण्ड-नेपाल समूहले प्रदेशसभामा अविश्वास प्रस्ताव टेबल गरी छलफल सुरु गर्नुपर्ने अडान राखेकाे थियाे ।