शेयरबजारमा साताको पहिलो दिन आइतबार नै नेप्से सूचक ५० अंकको उछाल आउँदा एकै दिन १ सय १९ कम्पनीका लगानीकर्ता हर्षित बनेका छन् । हरियाली बनेको बजारले सो कम्पनीको शेयरमूल्य बढाउँदा लगानीकर्ता खुसी भएका हुन् ।
आइतबार शेयरबजार परिसूचक नेप्से ५०.२० अंकले बढेर २४२४ दशमलब ८४ अंकमा पुग्दा २ सय ७ कम्पनीको १ कारोड ९३ लाख ७९ हजार ४२ कित्ता शेयर ९ अर्ब ३७ करोड ६० लाख ५३ हजार २ सय २० रुपैयाँको कारोबार भएको हो ।
शेयरबजारमा झन्झटिलो मानिँदै आएको राफसाफको चक्रको समय घट्नुका साथै नागरिक स्टक डिलको शेयरबजारमा प्रवेशको प्रभाव आजको बजारमा देखियो, जसले गर्दा सूचकसँगै लगानीकर्ता पनि हौसिए ।
सेन्सेटिभ परिसूचक ६ दशमलव ४७ अंकले बढेर ४५२ दशमलव ०६ अंकमा पुग्दा बैंकिङ समूहको नेप्से सूचक बढेर हरियाली बनेको छ । कारोबारमा आएको व्यापार समूहबाहेक बैंकिङ, होटल, विकास बैंक, जलविद्युत, वित्त, जीवन बीमा, निर्जीवन बीमा, उत्पादन तथा प्रशोधन, अन्य, लघुवित्त र म्युचुअल फण्डका नेप्से सूचक बढेका छन् ।
सूचक हरियाली बनेसँगै शेयरमूल्यमा नै उछाल ल्याउने कम्पनीको पनि आज कमी देखिँदैन । आइतबार एकै दिन पाँच कम्पनीको शेयरमूल्यमा सकारात्मक सर्किट लागेको छ भने बाँकी १० कम्पनी पनि सर्किटनजिक पुगे । सर्किट लगाउनेमा भने मिथिला लघुवित्त वित्तीय संस्था, ग्रामीण विकास लघुवित्त वित्तीय संस्था, गुराँस लाइफ इन्स्योरेन्स, गुराँस लघुवित्त वित्तीय संस्थाले १० प्रतिशतले शेयरमूल्य बढाएका हुन् ।
शेयरमूल्यमा उछाल आएर बजार हरियाली बन्दा पनि ४६ कम्पनीको शेयरमूल्य भने घटेको छ । जसमा नारायणी विकास बैंकको शेयरमूल्यमा झण्डै नकारात्मक सर्किट लाग्न पुग्यो । सो कम्पनीको ९ दशमलव ९१ प्रतिशतले शेयरमूल्य घट्यो ।
