विराटनगर, २५ पुस-नेपाली कांग्रेस मोरङ क्षेत्र नम्बर ४ (ख)ले विराटनगर स्थित हाटखोला मैदानमा विरोधसभा आयोजना गरेको छ । कांग्रेसको देशव्यापी आन्दोलनको क्रममा मोरङ क्षेत्रनम्बर ४(ख)मा पनि बिरोध सभाको आयोजना गरिएको हो ।

सभामा नेपाली कांग्रेसका केन्द्रिय सदस्य महेश आचार्यले कुवेलामा प्रधानमन्त्री केपी ओलीले असंबैधानिकरुपमा प्रतिनिधिसभा विघटन गरेको आरोप लगाए ।

कोरोनाको महामारीबाट पीडित भएका जनतालाई राहत दिनुपर्ने, युवाहरूलाई रोजगारी दिनुपर्ने, कोरोना खोप खरिद गरेर जनतालाई सुरक्षित राख्नु पर्ने वेलामा प्रतिनिधिसभा विघटन गरी चुनाव घोषणा गरेर जनतालाई राहत नभई सास्ती दिएको आचार्यको भनाई छ । नेकपाले जनताको मतको अपमान गरेको आचार्यको आरोप छ ।

बिरोध सभालाई सम्बोधन गर्दै विराटनगर महानगरपालिकाका मेयर भीम पराजुलीले केपी ओलीको सरकारले आफू सरकारमा टिकिरहन र सर्वसत्तावाद लाद्न असंबैधानिक कदम चालेको बताए । पराजुलीले प्रधानमन्त्री ओलीले चालेको असंबैधानिक कदमको जति भत्सना र बिरोध गरेपनि कम हुने बताए ।

बिरोध सभालाई स्थानिय नेताहरूले पनि सम्बोधन गरेका थिए । ओलीको असंबैधानिक कदमको बिरुद्धमा देशव्यापी माहोल सिर्जना गर्न कांग्रेसले हरेक निर्वाचन क्षेत्रमा ¥याली, सभालगायतका बिरोध कार्यक्रम आयोजना गरिरहेको छ ।