काठमाडौं, १० पुस-अनेरास्ववियूका सहसंयोजक रञ्चित तामाङको समूहले संयोजक ऐन महरलाई कारबाही गरेको छ । संगठनको नीति, निर्णय र विधान विपरीतका काम जारी राखेकाले संगठनको बहुमतको निर्णयअनुसार महरलाई संयोजक पदमा नरहने गरी सहसंयोजक तामाङको समूहले कारबाही गरेको हो । उनले आफ्नो पक्षमा बहुमत सदस्य अर्थात ३३५ सदस्सीय केन्द्रीय समितिमा २१७ जनाले कारबाही गरेकाे जानकारी दिएका छन्।

आज विज्ञप्ति जारी गर्दै सहसंयोजक तामाङ समूहले महरलाई कारबाही गर्नुका साथै सो कारबाहीलाई अनुमोदन गर्नका लागि  नेकपाका केन्द्रीय कमिटीसमक्ष  सिफारिससमेत गरेको छ ।

‘विगतमा पटकपटक सम्झाउँदा पनि रूपान्तरण नभइ संगठनको नीति, निर्णय र विधान विपरीतका रवैया निरन्तर जारी राखेकाले अनेरास्ववियूको अन्तरिम विधान २०७६ को धारा ७ वमोजिम संगठनको बहुमतको निर्णय अनुसार ऐन महरलाई संयोजक पदमा नरहने गरी  कारबाही गरिएको र उक्त कारबाहीलाई अनुमोदन गर्नका लागि नेकपाका केन्द्रीय कमिटी समक्ष सिफारिस गरिएको छ,’ सहसंयोजक तामाङद्वारा जारी विज्ञप्तिमा भनिएको छ, ‘साथैनिकट भविष्यमा वस्ने केन्द्रीय कमिटीको पूर्ण बैठकबाट अन्य राजनीतिक तथा सांगठनिक निर्णय लिइनेसमेत जानकारी गराउँछौँ ।’

प्रधानमन्त्री केपी शर्मा ओलीले प्रतिनिधिसभा विघटन गर्ने कदम चालेसँगै त्यसको असर नेकपा विद्यार्थी संगठनमा पनि देखिएको छ । अनेरास्ववियूका संयोजक महर ओली र तामाङ प्रचण्ड-माधव समूहनिकटका मानिन्छन् ।  ओली पक्षले यसकाे प्रतिवाद गर्दै तामाङको समूहलाई समेत कारबाहीकाे तयारी गरेकाे बुझिएको छ ।