‘कमेडी च्याम्पियन सिजन २’ को फिजिकल अडिसन सुरु भएको छ । बुधबारदेखि निर्माण टिमले फिजिकल अडिसनको छायांकन सुरु गरेको हो । फिजिकल अडिसनको छायांकन चार दिनसम्म गरिनेछ ।

कमेडी च्याम्पियनको दोस्रो सिजनका लागि निर्माण टिमले भव्य सेट तयार गरेको छ । ठूलो लगानीमा तयार भएको सोही सेटमा नै फिजिकल अडिसनको छायांकन चलिरहेको निर्देशक विशाल भण्डारीले जानकारी दिए ।

निर्देशक भण्डारीका अनुसार दोस्रो सिजनका लागि ६ हजारभन्दा बढी डिजिटल अडिसन प्राप्त भएको थियो । जसबाट १ सय ८० प्रतियोगीहरुलाई फिजिकल अडिसनको लागि काठमाडौं बोलाइएको छ ।

फिजिकल अडिसनबाट उत्कृष्ट २४ प्रतियोगीहरु छानिनेछन् । जसमा केही प्रतियोगीहरूलाई जजले ‘गोल्डेन कि’ दिएर सिधै उत्कृष्ट २४ मा तान्न सक्नेछन् । बाँकी प्रतियोगीहरू भने जजले दिएको स्कोर र निर्देशक टिमको छनोटका आधारमा उत्कृष्ट २४ मा पर्नेछन् ।

बुधबार खिचिएको फिजिकल अडिसनबाट सिक्किमका विक्की अग्रवालले गोल्डेन कि हात पार्न सफल भएका छन् । यसको मतलव कमेडी च्याम्पियन दोस्रो सिजनको उत्कृष्ट २४ मा पर्ने पहिलो प्रतियोगीका रूपमा विक्कीले आफ्नो नाम दर्ता गरेका छन् ।

कमेडी च्याम्पियनका जजहरूमा यस वर्ष कुनै परिवर्तन भएको छैन । अघिल्लो वर्षजस्तै यस वर्ष पनि सन्तोष पन्त, मनोज गजुरेल, प्रदीप भट्टराई र ऋचा शर्मा नै छन् । निर्देशक भण्डारीका अनुसार यस शो ६ फेब्रुअरीबाट प्रसारण सुरु हुनेछ ।