सुर्खेत, वैशाख ४-कोरोना भाइरस (कोभिड–१९)को संक्रमण हुने डरले २ घण्टा मात्र खुल्ने बैंकहरूमा तल्ला तहका कर्मचारीमा त्रास छाएको छ ।बैंकमा लकडाउन पनि भीडभाड हुने, रकम झिक्ने र जम्मा गर्ने काम भएकाले बैंकका तल्ला तहका कर्मचारीमा त्रास छाएको हो ।

बैंकहरूको अनुगमन गर्ने निकाय राष्ट्र बैंकले सर्वसाधारणलाई सुविधा दिन निर्देशन दिएपछि लकडाउनका बेलामा पनि बैंकहरू खुलिरहेका छन् । बैंक खुल्ला रहँदा बैंकका शाखा प्रबन्धकहरूले तल्लाे तहका कर्मचारीलाई निर्देशन दिएर आफूहरू भने घरबाटै काम गरिरहेका छन् ।

सीमित मात्र खुलेका बैंकका शाखाले समय छोट्याएका भए पनि रूपैयाँबाट कोरोना सर्ने समाचार सुनेकाले आफूहरू अहिले जोखिम मोलेरै भए पनि काम गरिरहेको राष्ट्रिय वाणिज्य बैंकका एक क्यासियरले बताए ।

‘बैंकहरूमा आउने मान्छे लाइन लागेर आउँछन्,’ उनले भने, ‘हाकिम घरमा नै बसेर निर्देशन दिन्छन् । हामीले नै बैंकको सबै काम गर्नुपर्दा कोरोनाको त्रास छ ।’

बैंकहरूमा प्रायः लकडाउनका बेला क्यासियरभन्दा तल्ला कर्मचारी मात्र आउने गरेको र प्रबन्धकहरूले घरमा नै बसेर काम गर्ने गरेको एनआईसी एसिया बैंकका एक क्यासियरले बताए । ‘लकडाउनमा हाकिम सरहरूको मस्ती छ ।’ उनले भने, ‘हामीजस्ता तल्ला कर्मचारीले सास्ती भोग्नुपरेको छ ।’

बैंकहरूले आफ्ना ग्राहकलाई डिजिटल सेवा प्रयोग गर्न आग्रह गरिरहेका भए पनि सेवाग्राही पैसा झिक्न र जम्मा गर्न लाइनमा बस्ने गरेकाे बैंक कर्मचारीले जनाएका छन् ।