संक्रमणबाट मृत्यु हुनेमा १ बालिका हुन् भने १० जना पुरुष रहेका छन् । प्रवक्ता डा गौतमका अनुसार मृत्यु हुनेमा  महोत्तरीकी ४ वर्षीया बालिका, पर्साका ५३, ८० र ६०, काठमाडौंका ७० र ३५, महोत्तरीका ३७, सिरहाका ६५, बाराका ६० चितवनका ५२ र मकवानपुरको ५८ वर्षीय पुरुष रहेका छन् । नेपालमा कोरोना संक्रमणबाट निधन हुनेको संख्या २३९ पुगेको छ ।

प्रवक्ता डा. गौतमले कोरोना संक्रमणबाट मृत्यु हुनेको संख्या बढ्दो क्रममा रहेको बताएका छन् । उनले नेपालमा कुल संक्रमितमध्ये ०.५९ प्रतिशतको मृत्यु भएको तथ्यांक रहेको जानकारी दिए ।

पछिल्लो २४ घण्टामा १२ हजार ८८ जनाको पीसीआर परीक्षण गर्दा काठमाडौं उपत्यकामा ४८१ जनासहित देशभर १ हजार ६९ जनामा कोरोना संक्रमण देखिएको छ । हालसम्म ७ लाख ५ हजार ५६० जनामा पीसीआर परीक्षण गर्दा ४० हजार ५ सय २९ जनामा संक्रमण पुष्टि भएको मन्त्रालयको तथ्यांक छ ।

कुल संक्रमितमध्ये २२ हजार १ सय ७८ जना निको भएर घर फर्किएका छन् भने १८ हजार १ सय १२ जना सक्रिय संक्रमित संस्थागत तथा होम आइसोलेसनमा उपचाररत रहेको मन्त्रालयले जनाएको छ ।