विराटनगर, ३० साउन–समुदाय स्तरमा कोरोना भाईरसको संक्रमण फैलिन नदिन दक्षिणपूर्वी मोरङको रतुवामाई नगरपालिकाको सम्पूर्ण नगरक्षेत्रमा आगामी भदौ १० गतेसम्मका लागि बन्दाबन्दी(लक डाउन) गरिएको छ । यस अघि साउन ३० गतेसम्म गरिएकोमा थप गर्दै भदौ १० गतेसम्मका लागि नगरक्षेत्रमा बन्दाबन्दी गरिएको हो ।

छिमेकी सुनवर्षी र रंगेली नगरपालिकामा समुदायस्तरमा संक्रमण थप फैलँदै गएपछि संक्रमणको जोखिम न्युनिकरण गर्न भदौ १० गतेसम्मका लागि शिल गर्ने निर्णय गरेको नगरप्रमुख रविन राईले बताए ।

रतुवामाई नगरपालिकाको कोरोना भाईरस रोकथाम, नियन्त्रण, प्रतिकार्य तथा व्यवस्थापन कार्यदलको बैठकले बन्दाबन्दी थप गर्ने निर्णय गरेको हो ।

छिमेकी देश भारत र छिमेकी स्थानीयतहहरुबाट आउने व्यक्तिहरुबाट रतुवामाईमा संक्रमण फैलिने जोखिमलाई मध्यनजर गर्दै सम्पूर्ण नगरक्षेत्रमा गरिएको बन्दाबन्दी थप गरि कार्यान्वयन गरिएको नगर प्रमुख राईले बतए ।

उनका अनुसार सो अवधिभर स्वास्थ्य सेवा वहेक नगरपालिका, सवै वडा, नगर भरिका सम्पूर्ण कार्यालय र संघ÷सस्थाहरुबाट प्रदान गरिँदै आएको सेवा पूर्णरुपमा बन्द रहनेछन्।

त्यस्तै सम्भावित जोखिम न्युनिकरणका लागि नगर क्षेत्र भित्र एम्बुलेन्स बाहेकका सम्पूर्ण यातायातका साधनहरु समेत बन्द रहेको र अत्यावश्यक कामबाहेक सामान्य हिडडुल समेतमा थप कडाई गरिएको नगर प्रमुख राईले बताए ।

रतुवामाईमा बन्दाबन्दी थप गरिएसँगै नगरक्षेत्र अझ सुनसान देखिएको छ । नगर प्रमुख राईका अनुसार रतुवामाईमा हालसम्म समुदायस्तरमा कोरोना संक्रमण फैलिएको छैन ।

उनले हालसम्म भारतबाट आएर नगरका क्वारेन्टाइनमा बसेका ७७ जनामा मात्र संक्रमण पुष्टि भएको र सवै उपचारपछि घर फर्किसकेको बताए ।

बैठकले रतुवामाई नगरपालिकामा ५० शैयाको आइसोलेसन केन्द्र समेत निर्माण गर्ने निर्णय गरेको छ । रतुवामाईमा लक्षण बिनाका संक्रमित विरामीलाई राख्नका लागि आइसोलेसन केन्द्र केही दिन भित्रै सञ्चालनमा ल्याइने नगर प्रमुख राईले बताए ।