एजेन्सी, साउन १८-कोरोना भाइरसको संक्रमणदर निकै उच्च रहेको भारतमा संक्रमणबाट एक जना मन्त्रीको मृत्यु भएको छ । कोरोना भाइरसको संक्रमणबाट बिरामी भएकी उत्तर प्रदेशकी मन्त्री कमला रानी वरुणको मृत्यु भएको हो ।

योगी आदित्यनाथको क्याबिनेटमा शिक्षामन्त्रीको जिम्मेवारी सम्हालिरहेकी ६२ वर्षीया कमला रानीको आइतबार मृत्यु भएको हो । उनलाई १८ जुलाईमा कोरोना संक्रमण पुष्टि भएपछि लखनऊस्थित एसजीपीजीआई अस्पतालमा उपचाररत थिइन् । मुख्यमन्त्री आदित्यनाथले मन्त्री कमला रानीको निधनमा दुःख व्यक्त गर्दै आइतबार अयोध्या जाने आफ्नो कार्यक्रम रद्द गरेका छन् ।

कमला रानी सन् २०१७ को विधान सभा निर्वाचनमा कानपुरको घाटमपुरबाट विजयी भएकी थिइन् । भारतको लोकसभा सदस्यसमेत भइसकेकी कमला रानी सो क्षेत्रमा चुनाव जित्ने भारतीय जनता पार्टीकी पहिलो विधायक हुन् ।