मन्त्रालयका प्रवक्ता डा. जागेश्वर गौतमका अनुसार मृत्यु हुनेमा पर्साको वीरगञ्ज महानगरपालिका—११ का ५६ वर्षीय पुरुषको १५ साउनमा मृत्यु भएको हो । मुटुका रोगी ती पुरुषको आईसीयू र भेन्टिलेटरमा राखेर उपचार भइरहेको थियो । ६ साउनमा कोरोना पुष्टि भएपछि उनलाई भोलिपल्ट गण्डक अस्थायी कोरोना अस्पतालमा भर्ना गरिएको थियो ।

यस्तै, वीरगञ्ज महानगरपालिका-१६ का ३५ वर्षका पुरुषको १५ साउनमै गण्डक अस्पतालमा उपचारका क्रममा मृत्यु भएको हो । ५ साउनमा निजी क्लिनिक हुँदै तराई अस्पतालमा भर्ना भएका उनको स्वास्थ्यमा सुधार नआएपछि गण्डक अस्पतालमा भर्ना भएका थिए । १३ साउनमा अस्पताल भर्ना भएका उनको नमुना संकलन गर्दा हिजो नै कोरोना पुष्टि भएको थियो ।

यस्तै, वीरगञ्ज-२ का ६५ वर्षीय अर्का पुरुषको पनि १५ साउनमै कोरोनाका कारण मृत्यु भएको प्रवक्ता डा. गौतमले बताए । उनको मृत्युपछि कोरोना रिपोर्ट पोजिटिभ आएको हो ।

यस्तै, वीरगञ्ज– ११ स्थायी घर भई ललितपुरको थसिखेल– ५ बस्ने महिलाको पाटन अस्पताल ललितपुरमा उपचारका क्रममा निधन भएको प्रवक्ता प्रा.डा. गौतमले बताए । मधुमेहका बिरामी ती महिला ६ साउनमा अस्पताल भर्ना भएकी थिइन् ।

ज्वरो, खोकी र श्वासप्रश्वासमा समस्या आएपछि उपचारका लागि स्टार अस्पतालमा भर्ना भएकी थिइन् । ६ साउनमा नै कोरोना पुष्टि भएपछि उपचारका लागि पाटन अस्पताल भर्ना गरिएको थियो । योसँगै नेपालमा कोरोनाबाट मृत्यु हुनेको संख्या ५६ पुगेको छ ।