मन्त्रालयका प्रवक्ता प्रा.डा. जागेश्वर गौतमका अनुसार आज बाराको फेटा– ३ का ६० वर्षीय पुरुषको त्रिवि शिक्षण अस्पतालमा उपचारका क्रममा मृत्यु भएको हो । उनी निमोमिया, मस्तिष्कघात र मिर्गौलासम्बन्धी रोगबाट पीडित थिए ।

यस्तै, पर्साको वीरगञ्ज १० बस्दै आएका ६५ वर्षीय भारतीय नागरिकको पनि कोरोनाका कारण मृत्यु भएको छ । उनको १० साउन  विहान गण्डक अस्थायी कोभिड अस्पतालमा मृत्यु भएको हो । ती पुरुष मुटु र मधुमेह रोगका बिरामी थिए ।

यस्तै, धनुषा शहिदनगर– ८ का ३६ वर्षीय पुरुषको पनि ११ साउनमा कोरोनाका कारण मृत्यु भएको छ । १० साउनमा ज्वरो र खोकीसँगै श्वासप्रश्वासमा समस्या देखिएपछि प्रादेशिक अस्पताल जनकपुरको इमरजेन्सीमा भर्ना भएका थिए ।

आईसीयूमा राखेर उपचार गरिएपछि स्वास्थ्यमा सुधार नआएपछि उनलाई बीपी कोइराला स्वास्थ्य विज्ञान प्रतिष्ठान रेफर गरिएको थियो । उपचारका लागि लैजाँदै गर्दा उनको मृत्यु भएको हो । योसँगै नेपालमा कोरोनाबाट मृत्यु हुनेको संख्या ४८ पुगेको छ ।