काठमाडौं, १ साउन-नेपाल कम्युनिस्ट पार्टी (नेकपा)भित्रको आन्तरिक विवाद मिलाउन जुटेका अध्यक्षद्वय केपी ओली र पुष्पकमल दाहाल (प्रचण्ड) तथा वरिष्ठ नेपाल माधव नेपालबीचको छलफल सकारात्मक नभएपछि ओलीले बालुवाटारमा निकटस्थसँग छलफल थालेका छन् ।

६ पटकसम्म अध्यक्षद्वयबीच भएका वार्तापछि आज वरिष्ठ नेता नेपालसहित बसेर भएको छलफलमा पावर शेयरिङको विवाद नमिलेपछि ओली पक्षधर बेग्लै रणनीतिमा जुटेको हो ।

प्रचण्ड र नेपालले ओलीलाई दुवै पदबाट राजीनामा दिन यसअघि राख्दै आएको अडान नछाडेपछि तीन नेताबीचको विवाद मिल्न सकेन । भोलिका लागि तय भएको स्थायी कमिटी बैठक भने चलाउने सहमति गरेर उठेलगत्तै ओली आफ्ना पक्षका नेतासँगको परामर्शमा जुटेका हुन् ।

बालुवाटार निकटस्थ स्राेतका  अनुसार ओली आफूनिकटका सचिवालय र स्थायी कमिटी सदस्यसँग भोलिको बैठकमा कसरी प्रस्तुत हुने भनेर छलफल गरिरहेका छन् ।

उता प्रचण्ड र नेपाल पक्षधर नेता पनि अनौपचारिक छलफलमा जुटेका छन् । नेकपाभित्रका तेस्रो तहका नेताले नेतृत्वलाई मिल्न दबाब दिइरहेका बेला भएको शीर्ष नेताबीचको छलफलमा कुनै निष्कर्ष नआएपछि पार्टीको भविष्यलाई लिएर कार्यकर्ताले चिन्ता व्यक्त गर्न थालेका छन् ।