विराटनगर, असार ३०–प्रदेश १ मा बनाइएका अधिकाँश कानुन दराजमै थन्किएको सांसदहरूले गुनासो गरेका छन् । आजको प्रदेशसभा बैठकमा सांसदहरूले प्रदेशसभाले बनाएका अधिकांश कानुनहरू दराजमा थन्किएको गुनासो गरेका हुन । सांसद केदार कार्कीले लोकसेवा सम्बन्धमा कानुन बनेर पदाधिकारी नियुक्तभए पनि उनिहरू कामविहीन भएर बसेको बताए ।

उनले संघ भन्दा पहिले बनाइएको प्रदेश प्रहरी ऐन कार्यान्वयन हुनेमा पनि आशंका व्यक्त गरे । संघिय सरकारलाई समेत उछिनेर कानुन बनाउन प्रदेश सरकारले हतार गरिरहेको कार्कीको आरोप छ ।

प्रदेशका अधिकाँश कानुन दराजमा थुप्रिएकाले दराजमा मात्रै सजाउनका लागि कानुन बनाउनुको अर्थ नभएको उनको भनाई छ । प्रदेश यातायात सम्बन्धमा व्यवस्थागर्न बनेको ऐन २०७६ को पहिलो संसोधन सम्बन्धमा व्यवस्थागर्न बनेको विधेयकको सैद्धान्तिक छलफलमा भाग लिंदै कार्कीले प्रदेशका अधिकाँश कानुन संसोधन गर्न आबश्यक देखिएको बताए ।

विधेयकको सैद्धान्तिक छलफलमा भागलिंदै सांसद श्रीप्रसाद मैनालीले कानुनबनेपछि नियमावली आउनु पर्नेमा अझैसम्म नियमावली नआएको बताए ।

छलफलमा सांसदहरूले उठाएका प्रश्नको जवाफ दिंदै आन्तरिक मामिला तथा कानुन मन्त्री हिक्मतकुमार कार्कीले प्रदेशमा बनेका कानुनहरू कार्यान्वयनमा रहेको दाबी गरे । कार्कीले अधिकांश कानुन कार्यान्वयनमा रहेको र केहि कार्यान्वयनका क्रममा रहेको स्पष्ट पारे ।