विराटनगर, असार १३। किर्ते, आर्थिक अनियमितता, राजश्व छली, फर्जि साधारणसभा लगायतको आरोप लागेका उमेश विश्वकर्माका विषयमा अर्को सनसनीपूर्ण खुलासा भएको छ ।

बैधानिक रुपमा साधारणसभा नगरि फर्जि साधारणसभाबाट मानव अधिकारका लागि श्रोत विकास मञ्च(रिडेफ) नेपालको स्थापनादेखीनै अध्यक्षमा टिकिरहेका विश्वकर्माले नक्कली र फर्जि विल भरपाई पेश गरेर राजश्वनै छलि गर्ने गरेको तथ्य न्युज विराटलाई फेला परेको छ ।

आधारभूत तहका दलित समुदाय लक्षित र लाभान्वित हुने खालका कार्यक्रम संस्था मार्फत हालसम्म नगरि १ नं. प्रदेशको ‘स्वघोषित’ दलित अगुवा बनेका विश्वकर्माले व्यक्तिगत लाभ लिने मात्र नभई राज्यलाई झण्डै डेढ दशकदेखि कर छलि गर्दै आएको देखिएको छ । बहुमत संस्थापक तथा साधारण सदस्यलाई समेत बाइपास गरेर मनोमानि ढंगले व्यक्तिगत लाभ लिइराख्न पल्किएका उमेश विश्वकर्माले प्रत्येक वर्ष राज्यलाई करछलि गर्दै आएको पाइएको हो ।

उनले नक्कली तथा फर्जि भ्याट बिल र भरपाई पेश गरि संस्थालाई घाटामा देखाएर आयकर छलि गर्ने गरेका छन् । न्युज विराटलाई प्रााप्त तथ्य अनुसार विश्वकर्माले नक्कलि र फर्जि बिल भरपाई पेश गरि संस्थालाई घाटामा देखाएर आयकर छलि गर्ने गरेका हुन् ।

त्यति मात्र नभएर उनले राज्यलाई प्रत्येक वर्षको घरवहाल करसमेत छलि गर्ने गरेको खुलेको छ । राज्यले मुनाफारहित संघ संस्थालाई सहुलियत दिएको भएपनि विश्वकर्माले उल्टै कर छलि गरेका हुन् । उनले दाता संस्थासँग कार्यक्रमको फरफराक गर्दासमेत फर्जि र नक्कलि बिल पेश गर्ने गरेका छन् । सम्बन्धीत शिर्षकमा रकम खर्च नगरि त्यसको बिल पेश गरेर रकम जति आफैँ कुम्ल्याउने गरेको संस्थाकै सदस्यहरुको आरोप छ ।

‘स्वघोषित’ दलित अगुवा
प्रदेश राजधानी विराटनगर र सो आसपासकै पालिकाहरुका दलितसमुदाय संस्था मार्फत गरिने कार्यक्रमबारे बेखबर बनिरहँदा विश्वकर्माले आफुलाई स्वघोषित रुपमा दलित अगुवाको ‘बिल्ला’ भिराएको मोरङका दिलिप रजकले आरोप लगाए । ‘जुन मान्छेले आफन्त र चिनेजानेको केही व्यक्ति बाहेक अरुलाई संस्थाको गतिविधिमा कहिल्यै खबर गर्दैन । हाम्रो समुदायको हित भन्दा पनि नाम भजाएर खाएको छ, आफ्नो दुनो सोझ्याई राखेको छ । त्यस्तो व्यक्ति दलित अगुवा हुनै सक्दैन ।’ उनले भने,‘आफंैले आफैलाई घोषणा गर्दा त जे भने नि भयो ।’

त्यसो त व्यक्तिगत लाभ र भ्रष्टाचारबाट अकुत सम्पत्ति जोडेका उमेश विश्वकर्मालाई मोरङका दलित समुदायलेनै नरुचाउने गरेको पाइएको छ । श्रोतका अनुसार निजि स्वार्थ र लाभाका लागि मात्र तल्लिन रहने गरेका कारण विश्वर्मालाई सोही समुदायले. नरुचाएको हो ।

कार्यक्रम नगरि बजेट झ्वाम्
दलित समुदायको सवालमा काम गर्ने भनेर झण्डै डेढ दशकयता एक्सन एड, समता फाउण्डेसन, ओपन सोसाइटी फाउण्डेसन, एसियन ह्युमेन राईटस् कमिसन, प्लान इन्टरनेशनल, युएनडिपि, व्लर्डभिजनलगायत, तत्कालिन विराटनगर उपमहानगरपालिका, जिल्ला विकास समिति, विभिन्न सरकारी निकाय, राष्ट्रिय तथा अन्तराष्ट्रिय गैर सरकारी संस्थाहरुबाट बजेट ल्याएर उनै विश्वकर्माले देखावटी रुपमा केही कार्यक्रम गरि बाँकी सवै आफै मात्र लाभ लिने गरेको संस्थाकै एक सदस्यले नाम नबताउने शर्तमा बताए ।

उनका अनुसार अध्यक्ष विश्वकर्माले कतिपय कार्यक्रमनै नगरिसमेत रकम झ्वाम पार्ने गरेका छन् । दातासँग सम्झौता गरि ल्याएको सवै बजेट समुदायमै खर्च गर्नुपर्ने भएपनि त्यसो नगरि विश्वकर्माले आफै मात्र लाभ लिने गरेको श्रोतले जनाएको छ ।

एक्सन एड र समता फाउडेसनबाट ११ लाख प्राप्त
आर्थिक वर्ष २०७५/०७६ मा एक्सन एडको विराटनगर स्थित कार्यालयबाट ४ लाख र समता फाउडेसनबाट ७ लाख रुपैयाँ संस्थाले प्राप्त गरेकोमा कार्यक्रम नगरि खर्च गरेको देखिएको छ । अध्यक्ष उमेश विश्वकर्माले व्यक्तिगत लाभ लिने नियतले कार्यक्रम नगरि खर्च गरेको देखाइएको छ । लेखा परिक्षण प्रतिवेदनमा कुन कुन–कुन शिर्षकमा कति खर्च भनेर उल्लेख गर्नुपर्ने भएनि सोझै कार्यक्रम खर्च भनेर उल्लेख गरिएको छ ।

समता फाउडेसन र एक्सनएडबाट प्राप्त ११ लाख रुपैयाँ बजेटका बारेमा संस्थाका अन्य पदाधिकारी र सदस्यहरुनै अनभिज्ञ रहेको पाइएको छ । ‘गत वर्ष संस्थामा बजेट छैन भनेर दुईतीनवटा सामान्य कार्यक्रम गरिएको थाहा छ । यति ठुलो बजेट थियो भन्ने हामीले सुईँको समेत पाएका थिएनौँ ।’ एक सदस्यले भने,‘यति ठुलो रकम खर्च गरेको लेखा परिक्षण प्रतिवेदनमा देख्दा त तिन छक्क परियो । हामीले थाहा पाए अनुसार केही कार्यक्रम भए, जसमा यतिधेरै रकम खर्च भएको भन्नु पत्याउनै नसक्ने विषय हो ।’

श्रोतका अनुसार उमेश विश्वकर्माले केही कार्यक्रम गरि तस्वीरहरु खिचेर सवै कार्यक्रम गरेको देखाउन झुटो प्रचारबाजी मात्र गर्ने गरेका छन् । उनले कार्यक्रमनै नगरि एउटै ब्यानरमा मिति र कार्यक्रमको शिर्षक छोपेर फरक फरक प्रतिवेदन समेत बनाउने गरेका छन् ।

उमेश विश्वकर्माले गत वर्ष एक्सन एडबाट प्राप्त ४ लाखको कार्यक्रमको खर्चमा फर्जि बिल भरपाई पेश गरेका छन् । त्यसैगरी समता फाउडेसनबाट प्राप्त ७ लाख रुपैयाँको परियोजनामा केही सामान्य कार्यक्रम गरि रकमजती सवै ‘झ्वाम’ पारेका छन् ।

संस्थाका सदस्यहरुलाईनै संस्थाको आय व्ययको जानकारी नहुनु शंकास्पद भएको दलित युवा पशुपति पासवान बताउँछन् । ‘संस्थाकै सदस्यलाई संस्थामा कति पैसा आयो कति खर्च भयो भन्ने जानकरीनै नहुने भएपछि त्यो संस्थाले दलितको हितमा कति काम गर्यो होला ? सजिलै अनुमान लगाउन सकिन्छ ।’ उनले भने,‘त्यसबाट गरिब दलित लाभान्वित हुनेकुरा कल्पना गर्न सकिएला र ? यो सवै केही व्यक्तिले गरिव दलितको नाम भजाएर लुट मच्चाइ रहेका छन् । सरकारले यस्ताकुरा तत्काल नियन्त्रण गर्नुपर्छ । भ्रष्टचारीहरुलाई छानविन गरि कडा भन्दा कडा कारबाही गर्नुपर्छ ताकि अरु कसैले यस्तो हिम्मत नगरोस् ।’
यो पनि :

रिडेफ नेपालको दलित अभियान ‘देखाउने दाँत’ संस्था उमेश विश्वकर्माको ‘कमाईखाने भाँडो’

रिडेफ नेपालमा अध्यक्ष उमेश विश्कर्माको ‘मनोमानी’, साधारणसभाबिनै पद हेरफेर

‘नटवरलाल’ उमेश विश्वकर्माः विधानमा २ वर्ष बोर्डमा ३ वर्षे कार्यकाल

उमेश विश्वकर्माको ‘चर्तिकला’:फर्जि साधारणसभाबाट विधानसमेत संशोधन