डडेल्धुरा, १२ असार-आत्महत्या गर्ने धम्की दिँदै क्वारेन्टाइबाट घर गएकी कञ्चनपुरकी १ महिलासहित ६ जनामा कोरोना भाइरस (कोभिड-१९) पोजिटिभ देखिएको छ ।

शुक्लाफाँटा नगरपालिका-११ स्थित सरस्वती माबिको क्वारेन्टाइनमा रहेका १० जनालाई दबाब झेल्न नसकेको भन्दै वडा कार्यालयले पीसीआर रिपोर्ट नआउँदै घर पठाएको थियो ।

ती १० मध्ये ६ जनामा बुधबार कोरोना पोजिटिभ देखिएको हो । आत्महत्या गर्ने धम्की दिएपछि पीसीआर रिपोर्ट नआउँदै घर पठाउन बाध्य भएको अध्यक्ष दिलबहादुर बुढाले बताए । ‘पीसीआर गर्न ढिलाइ गरेको भन्दै एक महिलाले आत्महत्या गर्ने धम्की दिइन्,’ उनले भने, ‘त्यस्तो दबाब झेल्न नसक्ने अवस्था भएपछि हामीले सुरक्षितरूपमा घर बस्न भन्दै छोडेका हौँ ।’

क्वारेन्टाइनमा बसेको २ सातासम्म पनि उनीहरूको स्वास्थ्यमा समस्या नदेखिएकाले पनि घर पठाएको वडाध्यक्ष बुढाले बताए । ‘उहाँहरूको दबाब पनि धेरै थियो । स्वास्थ्यमा पनि समस्या थिएन । यस्तो अवस्थामा राख्नै नसक्ने भएपछि हामीले घर पठाएका हौँ,’ उनले भने ।

नगरपालिकाको निर्देशन नमानी वडा कार्यालयले आरडीटी पोजिटिभ भएकाहरूलाई घर पठाएको स्वास्थ्य शाखा प्रमुख परमानन्द भट्टले बताए ।

घर पुगेपछि संक्रमण पुष्टि भएका ६ जनाको सम्पर्कमा आएकाको खोजी भइरहेको उनले बताए । संक्रमण पुष्टि भएकाहरू भारतको दिल्ली र मद्रासबाट १२ जेठमा कञ्चनपुर आएका थिए ।