पोखरा, ७ असार-पोखरामा थप १ जनामा कोरोना पुष्टि भएको छ । पोखरा महानगरपालिका- १४ भेडीफारमका ४० वर्षीय पुरुषमा कोरोना पुष्टि भएको हो ।कोरोना अस्पतालको आइसोलेसन वार्डमा उपचाररत ९० वर्षीय पुरुषको सम्पर्कमा आएका उनको पीसीआर जाँच गर्दा कोरोना पोजिटिभ देखिएको हो । संक्रमण पुष्टि भएका पुरुष गत २ असारमा कोरोना पुष्टि भएका पोखरा– १४ का उक्त वृद्धको सम्पर्कमा आएका व्यक्ति भएको पोखरा महानगरपालिका स्वास्थ्य महाशाखाका प्रमुख हेमन्त शर्माले जानकारी दिए ।

कन्ट्याक्ट ट्रेसिङ गरी पोखरा महानगरकै क्वारेन्टाइनमा रहेका पुरुषमा कोरोना पुष्टि भएको उनले बताए । अर्का १ जनाको रिपोर्ट भने नेगेटिभ आएको शर्माले बताए ।

उपचारका लागि अस्पताल पुगेका वृद्धमा कोरोना पुष्टि भएपछि उनको सम्पर्कका पश्चिमाञ्चल सामुदायिक अस्पतालका ५३ जनाको स्वाब लिएको थियो । उनीहरूको स्वाब परीक्षणको रिपोर्ट शनिबार नेगेटिभ आएको थियो ।

आइतबार नै कास्कीको मादी गाउँपालिकाका १९ वर्षीय युवामा पनि कोरोना पुष्टि भएको छ । उनी भारतबाट आएर गाउँपालिकाको क्वारेन्टाइनमा बसेको गाउँपालिका अध्यक्ष बेदबहादुर गुरुङले जानकारी दिए । कास्कीमा यससँगै १७ जनामा कोरोना पुष्टि भएको छ ।