विराटनगर, जेठ ३२–इटहरी क्षेत्रमा बसोबास गर्ने सुनचाँदी कालिगढ मजदुरहरुलाई राहत वितरण गरिएको छ । दलित जनअधिकार मञ्च र साथी फाउण्डेसनले अखिल नेपाल सुनचाँदी कालीगढ संघ इटहरीसँगको सहकार्यमा सो क्षेत्रमा बसोबास गर्ने १ सय ९ सुनचाँदी कालीगढ मजदुर परिवारलाई राहत वितरण गरेको हो ।

गत चैत ११ गतेदेखि जारी बन्दाबन्दीका कारण काम ठप्प भएर दैनिक जिवन यापन गर्न समस्यामा परेका सुनचाँदी कालीगढ मजदुरलाई चामल, दाल, तेल, नुन लगायतका खाद्य सामाग्री राहत स्वरुप वितरण गरिएको हो ।

सो अवसरमा दलित जनअधिकार मञ्च तथा साथी फाउण्डेसनकी अध्यक्ष शान्ति गजमेरले बन्दाबन्दीका कारण सुनचाँदी पशल तथा व्यवसाय ठप्प भएर समस्यामा परेका सुनचाँदी कालीगढ मजदुरलाई थोरै भएपनि राहत होस भनेर खाद्यान्न वितरण गरिएको बताइन् ।

‘मुलुक अहिले कोरोना महामारिसँग जुधि रहेको छ । सवै क्षेत्र आक्रान्त बन्नेको छ । आर्थिक गतिविधिहरु बन्द भएर क्रमश सञ्चालनका क्रममा छन् । मुख्य सिजनमा पनि कोरोनाका कारण सुनचाँदी कालीगढहरु काम गर्न नपाएर समस्यामा पर्नुभएको छ ।’ उनले भनिन्,‘सवै ठप्प रहेको अवस्थामा थोरै भएपनि सहयोग पुगोस भनेर राहत वितरण गरिएको हो । यो नै प्रयाप्त होइन । आगामी दिनमा पनि यस्तै अवस्था रहे निरन्तरता दिइने छ ।’

राहत वितरणमा अखिल नेपाल ट्रेड युनियन महासंघ प्रदेश नं. १ का अध्यक्ष टिका प्रसाईँ, अखिल नेपाल सुनचाँदी कालीगढ संघका १ नं. प्रदेश इन्चार्ज अजय गदाइली, इटहरी इन्चार्ज कुमार गजमेर, नगर सदस्य विक्रम रसाइली, इलाका प्रहरी कार्यालय इटहरीका प्रहरी सहायक निरिक्षक शुन्दर कठायत लगायतको उपस्थिती रहेको थियो । राहत पाएपछी कालीगढहरुले संस्थालाई धन्यवाद दिँदै आगामी दिनमा पनि सामाजिक कामलाई निरन्तरता दिन आग्रह गरेका छन् ।