काठमाडाैं, ३२ जेठ-राष्ट्रिय प्रजातन्त्र पार्टी (राप्रपा)ले नेपाली भूमिबाट भारतीय सुरक्षाकर्मी हटाउने प्रक्रिया थाल्न सरकारसँग माग गरेको छ । आइतबार पार्टी अध्यक्ष पशुपति शमशेर राणाको अध्यक्षतामा बसेको केन्द्रीय सचिवालय कार्यव्यवस्था समितिको बैठकले भूमि फिर्ताका लागि बाँकी प्रक्रिया तत्काल थाल्न सरकारसँग माग गरेको हो । सीमा विवादमा भारतसँग सार्थक वार्ता गर्नुपर्नेमा पनि राप्रपाले जाेड दिएकाे छ ।

भारतबाट अतिक्रमित भूमि समेटेर तयार गरिएको नयाँ नक्सालाई संविधानकाे अनुसूचिमा समेट्न भएको संविधान (दोस्रो संशोधन) विधेयक पारित गराउन सरकारलाई समर्थन गरेको राप्रपाले देशको सिमानाबारे संसदबाट भएको सर्वसम्मत निर्णयलाई ऐतिहासिक र महत्त्वपूर्ण भनेको छ ।

यस्तै बैठकले पार्टी एकतापछि समायोजन र पार्टी दर्ता प्रक्रिया अघि बढाउने जिम्मेवारी सचिवालयलाई दिएको केन्द्रीय सचिवालयका प्रमुखहरू भास्कर भद्रा र ध्रुवबहादुर प्रधानले जारी गरेकाे विज्ञप्तिमा उल्लेख छ।