डडेल्धुरा, ३१ जेठ-डडेल्धुरामा थप २४ जनामा कोरोना पुष्टि भएको छ । शनिबार धनगढीस्थित सेती प्रादेशिक अस्पतालको प्रयोगशालामा गरिएको परीक्षणमा थप २४ जनामा कोरोना पुष्टि भएको हो ।

योसँगै डडेल्धुरामा कोरोना संक्रमितको संख्या ३९ पुगेको छ । डडेल्धुरामा शनिबार देखिएका कोरोना संक्रमितमध्ये नवदुर्गा गाउँपालिकाका २३ र अमरगढी नगरपालिकाका १ जना रहेको सेती प्रादेशिक अस्पतालका सूचना अधिकारी दिलिपकुमार श्रेष्ठले जानकारी दिए ।

उनका अनुसार कोरोना संक्रमित देखिनेमा नवदुर्गा गाउँपालिकाका २७ वर्षीय महिला, १९ देखि ४० वष उमेर समूहका २३ र अमरगढी नगरपालिकाका ३३ वर्षकी १ महिलामा कोरोना पुष्टि भएको हो ।

यस्तै, निको नभएर डडेल्धुराका ५ संक्रमितलाई घर पठाइएको छ । १४ दिनसम्म कोरोनाको कुनै लक्षण नदेखिएपछि स्वास्थ्य मन्त्रालयको निर्देशिका अनुसार उनीहरूलाई अस्पतालबाट डिस्चार्ज गरिएको हो ।

शनिबार जिल्लाकोे गन्यापधुरा गाउँपालिका–१ का ३८ वर्षीय पुरुष र १७ वर्षीय युवक, सोही गाउँपालिका–२ का १९ वर्षका युवक २५ र ५७ वर्षीय पुरुषलाई होम क्वारेन्टाइनमा बस्ने गरी पठाइएको स्वास्थ्य कार्यालयका भेक्टर कन्ट्रोलर सुपरभाइजर तथा कोभिड–१९ डडेल्धुराका सम्पर्क व्यक्ति हरिप्रसाद भट्टले जानकारी दिए ।

उनीहरूलाई डडेल्धुरा सदरमुकामस्थित अपि अस्पतालमा राखिएको थियो । जेठ ९ र १० गते भारतका विभिन्न शहरबाट आएका उनीहरूमा कोरोना पोजिटिभ देखिएको थियो ।

शनिबार ५ जना घर फर्किएसँगै डडेल्धुरामा अस्पतालबाट डिस्चार्ज हुनेको संख्या ६ पुगेको  छ । यसअघि परशुराम नगरपालिका–१० का २८ वर्षीय पुरुष कोरोना जितेर घर फर्किसकेका छन् ।