जनकपुरधाम, ३० जेठ-सर्लाहीमा सशस्त्र प्रहरीले चलाएको गोलीबाट १ जनाको मृत्यु भएको छ भने ३ जना भारतीय नागरिक घाइते भएका छन् । सर्लाहीको पर्सा गाउँपालिकास्थित नारायणपुरमा भारतीय समूहले शुक्रबार बिहान सीमामा ड्युटीमा खटिएका सशस्त्र प्रहरीमाथि आक्रमण गर्दा प्रतिकार स्वरुप गोली चलाएको थियो । भारतसँग सीमा जोडिएको सो स्थलबाट ड्युटीमा खटिएका १ प्रहरीको हतियारसमेत उनीहरूले खोसेर लाने क्रममा सशस्त्र प्रहरीले फायरिङ गरेको हो ।

सशस्त्र प्रहरीको फायरिङबाट ३ भारतीयलाई घुँडामूनि गोली लागेको छ । १ जनाको अवस्था गम्भीर छ । सशस्त्र प्रहरीको हतियार खोस्ने भारतीयलाई प्रहरीले पक्राउ गरी नियन्त्रणमा लिएको छ । उनलाई पनि गोली लागेको छ ।

शुक्रबार बिहान ४ जनाको समूहमा आएका भारतीय व्यापारी सामान लिएर जबरजस्ती नेपाल छिर्न खोजेपछि सशस्त्र प्रहरीले रोकेको थियो । त्यसलगत्तै ती व्यापारीनजिकको भारतीय गाउँमा गएर नेपाली प्रहरीले आफूमाथि दुर्व्यवहार गरेको भन्दै सयौँको संख्यामा उनीहरू सीमामा आएको बताइएको छ ।