बुटवल, २८ जेठ-रुपन्देहीको तिलोत्तमा नगरपालिका-१० कान्छीबजारको एक पशु फार्ममा ५ जनाको हत्यामा संग्लनलाई सार्वजनिक गर्न माग गर्दै स्थानीयले मृतकको शव उठान अवरोध गरेका छन् ।

शव लैजान २ वटा एम्बुलेन्स घटनास्थल पुगि सकेका छन् । तर, हत्यामा संग्लनलाई सार्वजनिक गनुपर्ने स्थानीयको मागले शव उठ्न सकेको छैन ।

‘हत्यामा संग्लनलाई सार्वजनिक नगर्दासम्म शव उठाउन दिँदैनौँ’, घटनामा ज्यान गुमाएका पोषराज मुसहरकी भाउजू प्रमेकली मुसहरले भनिन्, ‘विस्तृत अनुसन्धान नगरेरै शवलाई पोको पारेर लैजान दिँदैनौँ।’ गएराती भएको विभत्स हत्याकाण्डमा ५ जनाको ज्यान गएको छ ।

ज्यान गुमाउनेमा ४० वर्षीय माधव मुसहर, उनकी ३७ वर्षीया श्रीमती जानकी, १७ वर्षका करण चौधरी, १७ वर्षकै आशिष चौधरी र १४ वर्षीय पोषराज मुसहर रहेका छन् । घटनामा संग्लन रहेको आरोपमा फार्ममा सँगै काम गर्ने सुर्खेतका झपेन्द्र सिंजालीलालई प्रहरील पक्राउ गरेर अनुसन्धान अगाडि बढाएको छ ।